Cascos diz que'l mapa del AVE ye una "denuncia irrefugable" del aislamientu d'Asturies

UVIÉU, 17 de Xunu (EUROPA PRESS)

El presidente de Foru Asturies, Francisco Álvarez-Cascos, aprovechó qu'esti llunes s'inauguró la llinia d'AVE Madrid-Alicante pa volver denunciar la discriminación qu'al so xuiciu sufre'l Principáu en materia d'infraestructures estatales.

Cascos mostró'l mapa qu'ADIF facilitó a los medios sobre la rede d'AVE d'España y aseguró que "el mapa que dibuxa l'AVE tres la inauguración de la llinia Madrid-Alicante ye una denuncia irrefugable de la marxinación y l'aislamientu que sufre Asturies na política d'infraestructures estatales de los gobiernos d'España".

En rueda prensa celebrada na Xunta Xeneral tres la celebración de la Xunta de voceos, tamién Álvarez-Cascos refirióse a la "enorme preocupación" que se ta creando n'Asturies pola situación d'aislamientu derivada de los socesivos retrasos y paralizaciones na construcción y puesta en serviciu de la llinia d'AVE Madrid-Asturies, tres los últimos anuncios del Gobiernu de Rajoy.

Asina, recordó qu'hasta'l 2001, l'AVE a Levante yera l'únicu de toa España que nun tenía nin siquier trazáu planiáu, mientres l'AVE Madrid-Asturies taba yá en fase de Proyectu. Sicasí a día de güei l'AVE a Levante ta prácticamente acabáu y namás tien pendiente Murcia, mientres nel AVE d'Asturies ta prácticamente abandonáu en Lleón, "primero colos gobiernos de Zapatero y agora col de Rajoy".

Cascos indicó qu'ante esta situación "el Presidente d'Asturies, en nome d'Asturies, nun pue permanecer en silenciu" y añadió que Foru va considerar "irrelevante" cualquier solución que nun pase pel acondicionamientu pa la puesta en marcha de los tramos Lleón-La Robla y La Pola L.lena-Uviéu-Xixón-Avilés; la eliminación del fondu de sacu de Lleón, que ye una torga escandalosa y la rectificación de la decisión "incompetente y inaceptable del Gobiernu de Rajoy de poner en serviciu namás un túnel de la Variante, y n'anchu Renfe, qu'aisla tovía más a Asturies".