Cascos espera que'l Gobiernu asturianu nun quede en manes de partíos "que deben el puestu a los sos xefes de Madrid"

UVIÉU, 24 de Febreru (EUROPA PRESS)

El presidente d'Asturies y candidatu por Foru a les próximes elecciones autonómiques, Francisco Álvarez Cascos, cree que'l futuru de la comunidá "nun pue quedar en manes de les persones que deben el so puestu al favor de los sos xefes de Madrid". A xuiciu del mandatariu autonómicu, al PP y al PSOE "impórta-yos muncho Andalucía y bien poco Asturies".

Nestos términos señalólo nun actu políticu en Perlora, nel que mostró'l so refugu a qu'Asturies seya "una sucursal de la oficina central de la capital, a la que los xefes vengan a pidir tranquilidá a los 100.000 paraos, y pidir silenciu a los asturianos indignaos que se remonten contra la marxinación y l'olvidu d'Asturies". "Tán bien preocupaos colos problemes d'Andalucía y bien poco colos d'Asturies, como escuchamos nel Parlamentu estos díes", señala'l candidatu de Foru.

Cascos criticó duramente al PP, porque "la mayoría de los asturianos saben qu'esti partíu zarró les puertes al cambiu pa que too siguiera igual, como demostró refugando'l Presupuestu del cambéu del Gobiernu de FORU, ya imponiendo a los asturianos el Presupuestu d'Areces que refugara va un añu".

El presidente asturianu calca en que'l so partíu prometió "tresparencia y nun aceptó combayadures nin componendes colos depredadores del dineru de toos, nin na Fundación Niemeyer, nin na TPA, nin en nengún chiringu". "Prometimos lluchar contra la corrupción, y modificamos les normes de contratación pa torgar les irregularidaes. Prometimos austeridá y practicámosla retayando los gastos en personal, en coches, en teléfonos, en comida y viaxes Prometimos dar prioridá a la Sanidá, a la Educación y al Bienestar Social y dedicamos los recursos necesarios, de forma que somos l'únicu Gobiernu Autonómicu n'España que lo cumplió", señala l'aspirante a la presidencia autonómica..

"Prometimos un Gobiernu cercanu y pa toos, y nun hai naide, nin alcaldes nin ciudadanos, que puea acusamos d'atender namás a los nuesos correlixonarios de partíu. Prometimos tar al serviciu de los asturianos frente a los políticos d'oficiu, y demostremos la desapegadura a los cargos apelando a los asturianos pa que desbloquien la paralización política que provocaron el PP y el PSOE", esplicó na so intervención.