Cascos, llamáu a declarar en calidá de testigu nel casu d'un unvíu masivu de SMS contrarios a Sacyr

MADRID, 21 de Payares (EUROPA PRESS)

L'ex vicepresidente del Gobiernu y ex ministru de Fomentu Francisco Álvarez-Cascos ta citáu güei a declarar ante'l Xulgáu d'Instrucción númberu 1 de Madrid como testigu pola so supuesta rellación con un unvíu masivu de mensaxes de móvil (SMS) alvirtiendo d'una posible suspensión de pagos de Sacyr Vallehermoso en vísperes de les pasaes elecciones xenerales, según confirmaron a Europa Press en fontes xurídiques.

El xuez instructor del casu, Pedro López, llamó a declarar a Cascos pa que se pronuncie sobre l'unvíu d'ún d'estos SMS, que se produxo'l pasáu 20 de febreru dende un móvil contratáu por Aqualium Spain, una de les empreses del ex ministru, según adelantó ayeri 'La Vanguardia'.

Les mesmes fontes señalaron que "nun se descarta que'l xuez cambie la so situación de testigu y lu considere acusáu tres toma-y declaración". De la mesma manera, confirmaron que dientro de la causa yá declararon delles persones y que, pel momentu, la Fiscalía nun se pronunció sobre l'orixe del mensaxe de móvil.

El Xulgáu d'Instrucción númberu 1 de Madrid almitió a trámite'l pasáu mes de marzu la denuncia presentada pol grupu Sacyr Vallehermoso escontra un mensaxe de testu unviáu de manera masiva al traviés del teléfonu móivil nel que s'alvertía d'una "próxima suspensión de pagos" del grupu.

En concreto, el SMS recoyía'l siguiente testu: "próxima suspensión de pagos de Sacyr Vallehermoso. El PSOE responsable de pautar inmunidá y pagar a los responsables de dicha compañía a cambio d'aguantar hasta dempués de les elecciones. Zapatero xugóse'l puestu. Pásalu".

Tres recibilu hasta emplegaos de la propia compañía, el grupu que preside Luis del Rivero presentó una denuncia sobre'l mesmu ante dichu xulgáu'l 21 de febreru d'esti añu. Tres almitise a trámite, entamó la correspondiente investigación p'averiguar la procedencia del mensaxe. La Brigada d'Información Teunolóxica de la Policía Xudicial ta desarrollando les indagaciones.

En fontes oficiales de Sacyr Vallehermoso esplicaron güei a Europa Press que'l grupu sólo presentó una denucnia escontra l'unvíu de mensaxes por considerar que suponía un fechu cosntitutivu de delitu y perxudicial escontra la empresa. La denuncia yera escontra l'unvíu de mensaxe y non contra una persona en particular, según sorrayaron.