Cayo Lara (IU) diz que'l 2008 ye l'añu de "cero Zapatero"

EP

MADRID, 30 d'Avientu (EUROPA PRESS)

El coordinador xeneral d'Izquierda Unida (IU), Cayo Lara, afirmó güei que s'acabó'l "tiempu del talante, del 'buen rollo'", del presidente del Gobiernu, José Luis Rodríguez Zapatero, y recalcó qu'agora tien que "entamar el tiempu del talentu, que ye'l qu'hai que forxar dende IU con tola xente, movimientos sociales y sindicales, pa xenerar una alternativa seria a lo existente, porque la llibre economía de mercáu fracasó de manera clara".

En rueda prensa, aseguró que'l 2008 qu'agora acaba foi l'añu de "cero Zapatero", y contó amás con un PP nuna "política d'atrápalo too y demagoxa en polítiques sociales y económiques", porque, según sorrayó, nun se pue pidir que se baxen los impuestos y s'ofrezan más servicios. "Nun hai que volver los güeyos al PP, sinón a la izquierda alternativa d'IU", aseguró.

Siguiendo col balance del añu, Lara resaltó que'l 2008 pieslla col "escándalu" de los vuelos de la CIA, les tropes españoles tovía n'Afganistán --reclamó una vez más la so retirada--, tres millones de paraos, nueve millones de probes, un millón de viviendes ensin vender, un Gobiernu "xenerosu cola banca y cicateru col drama de los paraos y los más débiles".

Asina, llamentó qu'agora esi fracasu de la economía de mercáu lu tean pagando los trabayadores, a pesar de "nun ser culpables" de la situación actual. Destacó tamién que fracasó'l modelu de desarrollu "especulativu, ambiciosu y non productivu basáu nel lladriyu".

Poro, espunxo qu'IU tien alternatives que quier esplicar a lo llargo d'esos 1.000 actos que pretende organizar y secundar en tol país. Ente estes propuestes, Lara destacó la banca pública, intervención pública na economía, reformes fiscales que nun dañen a les arques de la Facienda Pública, proteición social y economía productiva.

CONCEYOS CON PSOE Y PP

El cabezaleru d'IU adelantó, amás, la intención de la nueva Direición de la coalición de dirixise a PSOE y PP pa aconceyase y tratar sobre "temes d'Estáu". Avanzó que l'alcuentru colos socialistes podía tener llugar dempués d'estes fiestes, puesto que yá hubo dalgunos contactos col so vicesecretariu xeneral, José Blanco.

Esplicó que tanto col PSOE como col PP quieren aconceyase pa falar sobre llei electoral, modelu d'Estáu, los déficits que la Constitución tien en cuanto al derechu al trabayu, a una vivienda, fiscalidá progresiva y que la riqueza que'l país xenera se ponga al serviciu del propiu país.

Pa Lara, la refundación n'IU ya entamó, la coalición entró nun tiempu nuevu, y esperó qu'ésti seya "granible". Reconoció, eso sí, que'l 2008 foi un añu "intensu" pa la so organización, si bien matizó qu'en llinies xenerales quedó protatonizáu pola llegada de la crisis.

Sobre'l resultáu electoral que provocó la dimisión del so predecesor, Gaspar Llamazares, plantegó qu'hai un parlamentu que nun representa con rigor la voluntá de los ciudadanos, puesto que según los so cálculos, IU tenía que contar con 14 diputaos. Aprovechó asina pa criticar al sistema electoral, una "inxusticia histórica" qu'IU arrastra dende la so formación, y añadió que PSOE y PP son "los beneficiaos y responsables directos".