UVIÉU, 7 d'Ochobre (EUROPA PRESS)
El secretariu xeneral de CCOO n'Hunosa, Rubén García, acusó a la dirección de la hullera estatal, presidida por María Teresa Mallada, de ser el brazu executor de la SEPI pa conducir a la entidá a la estinción y el "zarru", magar la "falsa imaxe" que ta treslladando a la sociedá.
García, xunto col secretariu xeneral d'Industria de CCOO Asturies, Damián Manzano, cifró les inversiones realizaes pola compañía no que va d'añu nun 18% de lo comprometío (1,4 millones d'euros frente a ocho), y acusó a la presidenta de querer facer de la hullera "una empresa turística", cuando "sigue siendo una productora de carbón".
Ente los exemplos qu'ofreció de los "graves incumplimientos", cifró unos desfases del 50% n'infraestructures y del 86% n'obres comprometíes pal 2015. Señaló que na térmica de La Perea, "una planta estratéxica pal futuru", de los 1.350.000 euros pactaos pal añu invirtiéronse 10.000, el 1% y nel Área d'Ayer, "unu de los centros de más producción de la empresa, y unu de los trés que tendríen de siguir abiertos dempués del 2018, de 1.540.000 previstos invirtiéronse 80.000", señaló. Tamién recordó qu'en pozos y llavaderos invirtiéronse 1,4 millones frente a los cinco previstos.
Como resultáu, según García, la empresa esti añu produxo hasta'l 31 de setiembre 222.000 tonelaes de carbón, el 59% de lo comprometío pal 2015 "a trés meses de qu'acabe l'exerciciu". El responsable sindical entiende que si nun se cambia esta dinámica la empresa ta "condenada al zarru", y considera que la dirección ta treslladando "una imaxe irreal", en referencia a los anuncios d'inversiones y proyectos fechos públicos nos últimos díes.
Alertó que l'únicu compromisu que ta cumpliendo Hunosa ye'l de les prexubilaciones, pero dexó bien claro que lo que-y importa a CCOO son los 1.300 trabayadores (1000 de plantiya y otros 300 de subcontrates) n'a fecha 1 de xineru del 2019 "nun van tener nenguna alternativa de futuru".
Reclamó a la Sociedá Española de Participaciones Industriales (SEPI) l'apuesta real poles esplotaciones de cielu abiertu asina como pola biomasa, y l'aprovechamientu comercial del metanu almacenáu nes esplotaciones. Tamién esixó les inversiones na Planta de La Perea, "que permitan llograr el llamáu carbón verde", y matizó qu'esti añu tán produciéndose n'España cuatro millones de tonelaes mientres s'importen 16 millones de carbón estranxero "que contamina exactamente lo mesmo".
