UVIÉU, 23 de Marzu (EUROPA PRESS)
La Federación d'Enseñanza de CCOO acusó esti llunes a la Conseyería d'Educación de "despreciar" l'asignatura de Llingua Asturiana nos proyectos de decretu d'ordenación y currículu de la ESO y el Bachilleratu n'Asturies, que "suponen un nuevu revés a la presencia de la Llingua Asturiana como materia curricular dientro del sistema educativu, por cuenta d'un gran retayu horariu en Bachilleratu y a la competencia con nueves materies optatives na Educación Secundaria Obligatoria".
Nuna nota prensa, la central critica que "la carga horaria prevista nel Bachilleratu pase de les cuatro hores a la selmana qu'había hasta agora a una hora, quedando equiparada cola Relixón". "Na ESO veráse obligada a competir con cuatro asignatures optatives: Segunda Llingua Estranxera, Iniciación a l'Actividá Entamadora y Empresarial, Cultura Clásico y una materia más propuesta pel centru", añadió.
Pal sindicatu, "esta regulación pon una vez más de manifiestu'l despreciu y falta de consideración que'l Gobiernu d'Asturies tien sobre'l nuesu patrimoniu cultural más relevante". "Col desarrollu curricular l'asignatura queda arrequexada y con una presencia puramente testimonial y, ante la negativa del MEC a crear la especialidá, los nuesos responsables políticos son incapaces de reaccionar y de llevar a cabu los trámites pertinentes pa evitalo", añadió.
CCOO considera "inaceptable y denunciable" l'actitú de la Conseyería d'Educación al "nun defender que la Llingua Asturiana tenga la presencia que se merez dientro de la Educación Secundaria Obligatoria y el Bachilleratu".
La organización encamienta a los responsables educativos "que lleven a cabu una distribución d'asignatures que permita la protección del asturianu, igual que se fizo col decretu de primaria. Consideramos imprescindible, nesti contestu, arbitrar un sistema qu'evite entrar en competencia col restu d'asignatures específiques y de llibre configuración", acaba'l comunicáu.
