UVIÉU, 4 Jul. (EUROPA PRESS) -
El Sindicatu d'Enseñanza de CCOO d'Asturies criticó l'amenorgamientu inxustificáu d'hores d'asturianu pal próximu cursu na previsión de docentes. El sindicatu afirma recibir múltiples quexes formulaes por docentes y equipos directivos de distintos centros educativos en relación cola previsión de places vacantes de Llingua Asturiana pal cursu 2018/2019.
Acordies colos datos del sindicatu, el númberu de places a xornada completa a les que va poder optar el profesoráu interín d'esta asignatura na próxima axudicación baxa cuasi nun terciu con respectu al cursu actual, afirmó CCOO en nota de prensa.
Según CCOO munches de les places completes esistentes esti cursu foron contemplaes na previsión de necesidaes docentes "como medies xornaes". La rebaxa nel cálculu d'hores de Llingua Asturiana en munchos casos "nun coincide coles estimaciones realizaes nos centros educativos".
Nos colexos públicos onde s'imparte asturianu n'Educación Infantil, "nun se tuvieron en cuenta les hores d'esta etapa". A xuiciu de CCOO, "tampoco se respetó'l criteriu de los equipos directivos que pedíen el caltenimientu d'una plaza completa de Llingua Asturiana cola fin d'iguar distintes necesidaes del centru".
Per otra parte, el cálculu de necesidaes de los institutos básase nes hores de la ESO, tornando la posibilidá de que la materia pueda ser escoyida por estudiantes de Bachilleratu.
A lo último, en dellos centros, como la CEPA d'Uviéu, arrexunten al alumnáu de distintos niveles, "amenorgando'l númberu d'hores lectives asignaes a la materia".
"Too apunta escontra una planificación realizada, a partir de datos provisionales, siguiendo criterios economicistas, que rebaxa la matrícula de los centros col fin d'afacer la previsión de necesidaes docentes a contratos a tiempu parcial. En dalgún casu, como'l IES de Tinéu, estazáronse les hores d'asturianu en dos medies xornaes, una de les que foi ampliada a xornada completa al traviés de la adición d'hores de Llingua Castellana", aseguraron dende'l sindicatu.
A xuiciu de CCOO los axustes una vegada empecipiáu'l cursu nun faen sinón "empiorar entá más" les condiciones llaborales de los docentes de Llingua Asturiana, "un colectivu integráu mayoritariamente por profesoráu interín que con frecuencia se ve obligáu a solicitar el so puestu de trabayu ensin saber cuál va ser el númberu real d'hores lectives que tendrá d'impartir, lo que tien consecuencies evidentes sobre'l so salariu".
CCOO reclama a la Conseyería d'Educación que la previsión de necesidaes docentes fáigase a partir de datos reales, realizando un sondéu de matrícula enantes de rematar el cursu, cola fin d'evitar los perxuicios que se vienen causando añu tres d'añu al profesoráu interín de Llingua Asturiana, garantizando, coles mesmes, el derechu del alumnáu a estudiar la materia en tolos niveles de la enseñanza reglada.
