UVIÉU, 21 May. (EUROPA PRESS) -
El sindicatu CCOO afirmó que la previsión de plantía realizada pal cursu 2018/2019 nun contempla les hores d'asturianu d'Educación Infantil, "poniendo en peligru'l caltenimientu de los grupos onde se ta dando de forma esperimental".
Según indicaron al traviés de nota de prensa, el sindicatu lleva tiempu denunciando lo que considera un "parón" nel procesu d'implantación del asturianu n'Educación Infantil qu'anunciara la Conseyería a finales del cursu 2016/2017.
Una situación qu'a xuiciu de CCOO, contradiz les declaraciones del conseyeru Genaro Alonso, qu'anunció hai más d'un añu que se diba camudar el Decretu curricular d'Educación Infantil pa inxertar dellos conteníos d'asturianu nesta etapa y regular les enseñances d'asturianu nos centros onde yá se tán dando de forma esperimental.
Sicasí, pal sindicatu, la "omisión" de les hores d'asturianu na plantía prevista pal añu viniente "pon en peligru'l caltenimientu de les esperiencies d'escolarización con alumnáu de 5 años que tán en marcha".
Asina, espliquen que nel CP La Gesta, "onde les cifres d'alumnáu que recibe clases de Llingua Asturiana nun pararon d'aumentar nos últimos cursos", la dotación prevista pola Alministración ye de media plaza, en cuenta de la plaza completa con que contaba'l colexu esti cursu.
Amás, indiquen que la previsión de plantíes faise enantes de que l'alumnáu formalice la matrícula, polo qu'alerten que, como "tolos años", la previsión estimada en munchos centros va ta perbaxo de la matrícula real. "Resulta incomprensible que la Conseyería d'Educación nun compute les hores de les esperiencies pedagóxiques que yá tán en marcha col alumnáu de 5 años", denuncien.
Por eso, CCOO recuerda que la esclusión de la enseñanza del asturianu na Educación Infantil constitúi un incumplimientu de la Llei d'Usu del Asturianu, que determina que'l Principáu ha asegurar l'enseñu d'esta llingua en tola enseñanza reglada, y afirmen que la única actuación "llexítima" ye xeneralizar la ufierta voluntaria.
