Un centenar de persones se concentró güei ante la Xunta Xeneral del Principáu d'Asturies pa exixir la reconocencia de la oficialidá de la llingua astuirana nel estatatu que resulte de la reforma que güei entamaba cola celebración de la ponencia.
La concentración taba convocada pol Conceyu Abiertu pola Oficialidá. Los asistentes llevaben pancartes a favor de la reconocencia del asturianu, y colgaron de les rexes qu'arrodien la Xunta Xeneral delles fueyes con pallabres n'asturianu, como alcordanza, emprincipiar o bardial.
Demientres el trescursu del actu, cantáronse conseñes como 'Oficialidá', 'L'Asturianu llingua oficial', o 'Ya, ya, ya, oficialidá'. Ente los asistentes, tuvieron los diputaos d'Izquierda Xunida Noemí Martín y Francisco Javier García Valledor, amás del voceru del Bloque por Asturies, Rafael Palacios.
El voceru del CAO, Fernando Ornosoa, llamó a la "resposnabilidá" de los partíos políticos, pa que "nun zarren esta reforma estatutaria ensin aprobar la oficialidá de la llingua asturiana". "Ye la única garantía de supervivencia del asturianu", recordó, porque "si nun s'oficializa, nun existe, ye invisible". Reivindicó'l "principiu d'igualdá ente los ciudadanos de diferentes comunidaes autónomes", recordando aquellos llugares con llingua propia oficial (Galicia, País Vascu, Cataluña, Comunidá Valenciana y Isles Baleares), y recordó la necesidá de que "l'asturianu puea usase n'ámbitu públicu y priváu". "Hasta nel ámbitu priváu, yo nun pueo nin facer un contratu de compraventa, nin un testamentu, nin un rexistru matrimonial n'asturianu", finó.