El Centru d'Interpretación del Paisaxe del Parque Natural de Fuentes del Narcea, Degaña y Ibias entamará esti añu

UVIÉU, 5 de Febreru (EUROPA PRESS)

El Centru d'Interpretación del Paisaxe del Parque Natural de Fuentes del Narcea, Degaña y Ibias entrará en funcionamientu esti añu. De la mesma manera, el Gobiernu asturianu invertirá más de cuatro millones d'euros nel conceyu de Degaña n'actuaciones medioambientales, mayoritariamente vinculaes al Parque Natural.

Asina lo anunció güei la viceconseyera de Mediu Ambiente, Belén Fernández, que visitó 'Casa Florencio', en Zarréu, nel conceyu de Degaña, un equipamientu qu'acoyerá'l Centru d'Interpretación del Paixase del Parque natural de Fuentes del Narcea, Degaña y Ibias.

Demientres la visita la Viceconseyera tuvo acompañada pol Director de Biodiversidá y Paisaxe, José Félix García Gaona, l'alcalde del conceyu, Jaime Garteh Flórez, y el director del Espaciu Natural, Emilio Capitel.

La titular de Mediu Ambiente anunció que'l proyectu del centru supunxo una inversión de más de 1,6 millones d'euros, según informó'l Gobiernu asturianu en nota de prensa.

De la mesma, la viceconseyera aprovechó esti actu pa presentar el proyectu de la EDAR de Degaña y acabó la so visita al conceyu pasando peles obres de saniamientu y depuración del nucleu d'El Rebol.lal.

CENTRO D'INTERPRETACIÓN DEL PAISAXE

'Casa de Florencio' ye una construcción que data del sieglu XIX con horru y capiella incluyíos na finca, que se rehabilitó nel so conxuntu a lo llargo de los dos últimos años hasta dotala de les instalaciones necesaries p'acoyer una oficina d'atención al públicu, delles sales de'interpretación del paisaxe, una amplia sala de conceyos y proyeición y una pequeña sala d'audiovisuales.

Amás, dispón d'otra sala con un caráctr etnográficu, 'La Txariega', onde se podrán conocer los valores culturales de la zona y la so vinculación cola creación de paisaxe y l'aprovechamientu de los recursos naturales. Tamién acocyerá dellos despachos cedíos al Ayuntamientu que collabora nel proyectu al traviés del programa Proder.

La rehabilitación del edificiu supunxo una inversión de 1.064.626 euros. Previamente, la finca mercárenla por un importe de 180.253 euros. Amás, el proyectu espositivu presentáu güei supunxo un gastu adicional de 19.795 euros. Pela so parte, la dotación espositiva del centru tien un coste estimáu de 344.924 euros.

COLECTOR Y INSTALACIÓN HIXÉNICO-SANITARIA

Tres la presentación del nuevu Centru d'Interpretación, la viceconseyera presentó'l proyectu de Colector Xeneral y instalación hixénico-sanitaria de Degaña, una actuación qu'entama a executase nestos díes y que cuenta con un presupuestu de 990.000 euros. El so plazu d'execución ye de 14 meses, polo que se prevé que la obra acabe na primavera del 2011.

El proyectu diseñáu consiste na execución d'una rede de saniamientu y un sistema de depuración d'agües fecales mediante una rede separativa y acometíes particulares a les viviendes. La dimensión de los diámetros de los colectores a executar ta ente 250 y 400 milímetros y el llargor total ye 2.523 metros.

Demientres la presentación, Belén Fernández destacó que "dende'l Gobiernu del Principáu ta faciéndose un importante esfuerzu pa dotar a toos aquellos nucleos rurales con una población de más de 50 habitantes, como ye'l casu de munchos de los que van desarrollar equí nel Parque Natural de Fuentes del Narcea, Degaña y Ibias, d'aquellos servicios que-yos permiten meyorar la calidá de vida al empar que cuidar d'esti mediu tan privilexáu que los arrodia".