La CEOE diz que la confianza de los mercaos "nun se gana predicando, sinón faciendo coses"

EP

MADRID, 8 de Febreru (EUROPA PRESS)

El vicepresidente de CEOE y presidente de la so Comisión de Rellaciones Internacionales, Jesús Banegas, afirmó esti llunes, en rellación al viaxe a Londres entamáu pola vicepresidenta económica, Elena Salgado, y pol secretariu d'Estáu d'Economía, José Manuel Campa, que la confianza de los mercaos internacionales "nun se gana predicando, sinón faciendo coses".

Banegas, en declaraciones a la cadena COPE recoyíes por Europoa Press, señaló qu'España "ta obligada a ganase la confianza de los mercaos internacionales" y, nesti sen, consideró que tolos esfuerzos que vayan nesa direición "tarán bien fechos".

Sicasí, precisó que dicha confianza nun hai que ganala "predicando", sinón tomando midíes, y ehí insistió na necesidá de desarrollar un programa de recorte de gastu públicu corriente "mui importante", una reforma llaboral qu'introduza flexibilidá nes rellaciones llaborales y que permita crear emplegu y otres reformes estructurales.

Banegaes consideró que n'España la crisis "tocó fondu", pues la cayida del PIB "desaceleróse dafechu". Agora bien, el vicepresidente de la patronal alvirtió que'l problema d'España nun ye tanto si tien o non crecimientu económicu como si ye a crear emplegu.

"El problema d'España ye que necesita crecer muncho, muncho más qu'otros países, pa poder crear emplegu, y yo nun pienso que podamos falar a nivel de desemplegu de recuperación si nun tenemos un crecimientu que seya a recuperar emplegu. Eso ta nesti momentu alloñao de les nueses meyores espectatives a cortu plazu", reconoció.