Churruca argumenta perda de confianza y acusa al grupu municipal de crear una organización paralela al partíu

XIXÓN, 2 de Febreru (EUROPA PRESS)

L'hasta ayeri coordinador llocal d'IX-Xixón, Jesús Montes Estrada 'Churruca', xustificó esti xueves, nuna entrevista concedida a Europa Press, que dimitió del so cargu al perder la confianza d'una gran parte de los miembros del Conseyu Políticu celebráu esti miércoles. 'Churruca' defendió que la organización política ye "una y indisoluble", frente a comportamientos del grupu municipal nel Conceyu de Xixón d'actuar al marxe de partíu.

Nesti sen, señaló que la mesma dirección rexonal d'IU pidió esplicaciones en más d'una docena de veces al grupu municipal pol so comportamientu "absolutamente impropiu" con relación a la organización. Señaló, nesti sen, qu'a xuiciu d'algunos al traviés del grupu municipal taba dándose "una organización paralela, que ye la que domina los recursos económicos".

Negó, amás, que se pidiera verbalmente con antelación la celebración d'un Conseyu Políticu monográficu pa tratar una supuesta "tensión" ente la Dirección y el grupu municipal y remarcó que se fizo la solicitú'l pasáu día 30, por 30 de los 49 miembros d'esti Conseyu, una hora y media dempués de que'l presidente rexonal, Francisco Álvarez-Cascos, anunciara elecciones antemanaes y sabiendo que'l día 1 convocara yá un Conseyu nel que se presentaría l'informe añal de xestión.

'Churruca' recordó que foi él mesmu'l que propunxo a Jorge Espina como cabezaleru de llista pa sustituyi-y nes pasaes elecciones llocales y calcó en que nel so día anunció que nun añu o dos dexaría la Dirección de la organización. Ye por ello, que dixo nun entender que les "zarapicaes y puñalaes traperes recibíes con nun sé sabe qué oxetivu".

NAIDE PENRIBA DEL PARTÍU

Sobre si s'arrepiente de designar a Jorge Espina como'l so sustitutu, remarcó que nun ye cuestión d'arrepentise y apuntó que la xente tien qu'ubicase orgánicamente. "Yo soi la espresión d'un eslabón d'una cadena", manifestó pa dempués calcar en que "hailu que nun cai nesa clave y piensa que ta penriba de la organización". "Naide ta penriba de la organización", dexó claro.

Coles mesmes, indicó sobre'l pidimientu escritu d'un Conseyu Políticu específicu que nunca se fizo nesta organización, yá que nun ye necesario y porque pa eso son los mesmos Conseyos, pa falar y ponese d'acuerdu. Pa él, el debate tendría que ser cómo meyorar n'Asturies y llograr una mayor representación parlamentaria.

Al respecto de les acusaciones de Jorge Espina y el voceru del Conseyu Políticu, Toni Hevia, de que l'informe refugáu tenía información "sesgada", indicó que ye "una interpretación del que nun quier ver les coses". "Lo qu'apaez nel informe ye exactamente asina", dixo antes de considerar que lo que tien que preocupar, al so paecer, son los 30.000 paraos de la ciudá, la cantidá de xente que nun cobra y que casi la metá de los paraos seyan mozos.

Per otru llau, dixo ser consciente del momentu políticu nel que presentó la so dimisión, a menos de dos meses d'unes nueves elecciones, pero resaltó'l bon resultáu electoral de los últimos comicios tanto autonómicos, llocales como nacionales, lo que confirma que la xente ta acordies con lo actuao pol partíu.

BAXOS RECURSOS ECONÓMICOS

En cuanto al informe de xestión refugáu, al que tuvo accesu Europa Press, nél remárcase la difícil situación económica de la organización, que tien como únicos ingresos los 600 euros mensuales que-y pasa'l grupu municipal colos que, según el testu, nun pue tenese si quier abiertu'l llocal de la sede.

Yá na Asamblea del 20 de payares del 2010 acordóse'l que'l 70 por cientu de los ingresos proviniera de los cargos públicos y, por tanto, de la estructura municipal. Tamién se remarca'l fechu de que tolos recursos tienen que tar a disposición de la organización y que tien que ser ésta la que determine'l so destín, una vez que los gastos de los grupos municipales tean cubiertos. Ye nesti puntu nel que s'incide en que tien de ser la organización política la que determine estos gastos, una vez escucháu'l grupu municipal.

Nel documentu tamién s'anima a potenciar la representación por territorios, tomando de referencia los Conseyos de Distritu y teniendo en cuenta que'l modelu yá se punxera en marcha na zona Oeste, pa lo que se precisa una mayor implicación. Tamién se fai referencia al "distanciamientu" que foi aumentando al respecto de la política -organizativa y institucional-- anterior y reivindícase'l pasáu del partíu, colos sos aciertos y los sos fallos.

"Cuando esti conceptu básicu de sen d'organización nun se tien claru, empieza a actuase dende la rocea, la prepotencia, el sectarismu y polo tanto nel regate en cortu (cortedá de mires), y con comportamientos que namás conducen a la división de la organización y lóxicamente a la interiorización del debate sin nenguna perspectiva pa hacia fuera", figura nel informe.