UVIÉU, 17 d'Ochobre (EUROPA PRESS)
El comité d'empresa de Bomberos d'Asturies, constituyíu n'asamblea permanente dende'l pasáu martes 14 d'ochobre na xerencia del SEPA, decidió abandonar el so enzarru dempués de caltener esta selmana dos reuniones col director xeneral de Xusticia ya Interior y el conseyeru de Presidencia.
Según indicó'l comité en nota prensa, na última xunta'l director xeneral de Xusticia ya Interior reconoció que'l sistema actual de trabayu "nun funciona", y pidió al comité d'empresa qu'estudiara una propuesta de solución que va conocer el próximu miércoles na dirección xeneral de Xusticia ya Interior.
Pal Comité, la disolución de l'asamblea permanente supón el "últimu xestu de bona fe" de los trabayadores de Bomberos d'Asturies, de cara a la xerencia del Serviciu d'Emerxencies del Principáu d'Asturies.
Sicasí, alvirtieron que, en casu de que la propuesta de solución seya "una midida de perda de tiempu", el comité "va tomar midíes de presión más drástiques" que, según dixeron, "van destapecer les faltes reales del serviciu".
RESPUESTA A LOS MANDOS ZARRAOS EN LA MORGAL
Per otra parte, ante les declaraciones del representante de los mandos de bomberos zarraos dende'l pasáu vienres nes instalaciones de La Morgal, el voceru del comité, Carlos Escalada, sorrayó que "nun quier entrar nuna rueda de preguntes y respuestes que nun lleven a solucionar el problema existente". Sobre la supuesta marxinación acusada polos mandos, el comité d'empresa destacó que "podríen participar, como'l restu de personal, nes dos asamblees de trabayadores celebraes ayeri y güei, que nun lo ficieron".
Nesti sen, esclararon que'l voceru de los mandos "miente cuando declara en prensa que lleven ocho años fuera de les meses de negociación". Ello ye qu'Escalada esplicó que l'actual Conveniu colectivu vixente dende'l 2007 negocióse naquel momentu "per parte de los mandos zarraos, siendo ún d'ellos "el presidente del comité".
El voceru de los mandos, prosiguen dende'l Comité, "tampoco cuenta tola verdá sobre la disponibilidá d'efectivos". Asina aseguraron que "omiten, a sabiendes, qu'en munchos de los parques de bomberos nos qu'agora hai personal presente les 24 hores del día, antes taben sin serviciu presencial mientres la nueche, y nunca llevantaron públicamente la voz".
El voceru de los mandos, esplicó Escalada, "tendría que preguntar al xerente del SEPA, y non al comité d'empresa, el por qué los 'mandos zarraos' siguen con un sistema de trabayu basáu "na disponibilidá", un sistema que, "a les clares", nun cumple cola llexislación llaboral, según el comité.
