El Comité de Garantíes del PP nun toma nenguna decisión sobre Costa y Cobo

MADRID, 9 de Marzu (EUROPA PRESS)

El Comité Nacional de Derechos y Garantíes del PP celebró esti llunes una xunta pa tratar, ente otros asuntos, los espedientes disciplinarios abiertos al vicealcalde de Madrid, Manuel Cobo, y al ex secretariu xeneral del partíu en Valencia, Ricardo Costa. Sicasí, l'órganu disciplinariu nun tomó nenguna decisión y "va continuar nos próximos díes les xuntes", informaron a Europa Press fontes 'populares'.

Too apunta a que l'órganu disciplinariu del PP, que preside'l castellanolleonés Alfonso Fernández Mañueco, va rebaxar n'ambos casos la pena d'un añu de suspensión de militancia que propunxeron los dos instructores de los espedientes.

Costa y Cobo lleven más de cuatro meses suspendíos cautelarmente de militancia, el primeru por atribuyise la condición de secretariu xeneral del PPCV anque Génova lu daba por cesáu, y el segundu poles crítiques que llanzó contra la presidenta de la Comunidá de Madrid, Esperanza Aguirre.

El pasáu 27 de xineru fízose público que los instructores de los espedientes de Costa y Cobo (los diputaos Andrés Ayala y José Manuel Velasco, respectivamente) proponíen que Costa y Cobo resultaren sancionaos con un añu de suspensión de militancia, revisable a los seis meses.

L'órganu disciplinariu del PP comunicó dos díes dempués a los dos afectaos que disponíen de 15 díes hábiles pa presentar les alegaciones que consideraren oportunes. El 'númberu dos' d'Alberto Ruiz Gallardón nel Conceyu de Madrid fizo llegar les sos alegaciones darréu pero Costa optó por nun presentales. Dende mediaos de febreru ta pendiente una xunta del Comité de Garantíes, que se foi retardando hasta güei.

COBO Y COSTA, MÁS DE CUATRO MESES SUSPENDÍOS

El Comité de Derechos y Garantíes del PP acordó la suspensión cautelar de militancia de Cobo'l pasáu 4 de payares, n'escuchando les sos alegaciones esa mesma mañana. El vicealcade de Madrid yá pidiera anteriormente perdón poles declaraciones que fizo nun mediu de comunicación nes qu'aseguraba que yera "de vómitu" lo que l'entornu d'Esperanza Aguirre taba faciéndo-y al ex ministru Rodrigo Rato.

El diputáu valencianu calcó públicamente en que siguía tando al mandu de la Secretaría Xeneral del PPCV cuando en Génova lu daben por cesáu. La so "actitú" foi l'argumentu que s'usó p'adoptar esa decisión.

Nos últimos meses, Costa siguió ocupando'l so escañu nel Parlamentu valencianu. Hai una selmana, el PPCV nomólu nuevu voceru de la comisión de Desarrollu del Estatutu d'Autonomía nes Cortes valencianes --pese a tar suspendíu de militancia--, un puestu pol que va percibir un suplementu d'unos 600 euros al mes.

La secretaria xeneral del PP, María Dolores de Cospedal, restó importancia a esi nomamientu alegando que "nun tien más relevancia nin trescendencia". "Ye una cuestión que correspuende al PP de Valencia y ta dientro de la so propia autonomía", dixo va unos díes De Cospedal.