NUEVA DELHI, 28 d'Abril (de la enviada especial d'EUROPA PRESS, Carolina Jiménez)
El ministru d'Asuntos Esteriores y de Cooperación, José Manuel García Margallo, anunció qu'esti martes pela mañana completóse la evacuación de los españoles que taben llistos pa salir de Katmandú tres el terremotu del sábadu que costó la vida a más de 4.000 persones.
A los primeres 36 que llegaron el llunes de nueche a Nueva Delhi nun vuelu comercial de la compañía 'Spice Jet', súmense 79 que llegaron de madrugada nel Airbus 310 nel que'l ministru viaxara a Nueva Delhi. Esti martes pela mañana viaxaron a la capital India otros 12 españoles n'otru vuelu comercial de 'Spice Jet', lo que fai un total de 127 evacuaos pola Embaxada española. Otros 23 llograren salir de Katmandú pelos sos propios medios.
"Nesti momentu nun queda en Katmandú nengún español que puea embarcar", dixo Margallo en declaraciones a la prensa na embaxada española en Nueva Delhi. Ente los 127 evacuaos pola Embaxada, ocho colaron de Nueva Delhi el llunes de nueche, tamién pola so cuenta, y otros cuatro ficiéronlo esti martes pela mañana.
Tocantes a los 115 restantes, l'A310 de les Fuerces Aérees españoles el que viaxa'l ministru va tornar esta nueche a Madrid con 44 españoles y el restu van volver esti miércoles nun vuelu fletáu por Asuntos Consulares que tien prevista la so salida de Madrid la próxima madrugada.
Margallo precisó qu'en Nepal había nel momentu del terremotu 498 españoles, de los que siguen sin llocalizar 103 y otros 245 tán alcontraos pero fuera de Katmandú, y van evacualos o repatrialos a midida que vayan llegando. Esti martes llograron alcontrar al traviés d'un teléfonu por satélite a 5 montañeros que taben nel Annapurna.
"Toi encantáu y voi tar encantáu cuando puea alcontrar y repatriar a los que falten", dixo. El ministru acudió'l llunes pela nueche al aeropuertu a recibir a los primeros que llegaron a Nueva Delhi y aseguró que'l dispositivu preparáu lo mesmo en Katmandú como na capital india "funcionó como un reló" y los evacuaos pudieron tener "una cama y una ducha" dempués de pasar dos díes "en condiciones francamente males".
"La urxencia yera sacalos de Katmandú", insistió, y agospialos en Delhi "cola tranquilidá de que nun-yos va pasar nada. L'únicu turista evacuáu que quiso falar colos medios a la so llegada a Nueva Delhi relató que les autoridaes nepalines tratáronlos "como a perros" y que namás concedíen prioridá a ciudadanos indios y chinos.
Agora, la Embaxada va distribuyir a los españoles evacuaos nos dos aviones que van viaxar a Madrid, "con criterios absolutamente oxetivos", en palabres de Margallo, pa que los primeros en viaxar, esta mesma nueche, seyan los que tienen más urxencia -ayer viaxaba una persona con problemes d'espalda--.
P'atender a los españoles que tovía siguen en Nepal, la Embaxada va enviar un equipu "relativamente frescu" pa remplazar al que ta ellí dende'l domingu, ente ellos la cónsul, Laura García Alfaya, el conseyeru d'Interior, Ramón García Nieto y un policía. Esta tarde van viaxar Emilio Contreras, el Policía Rubén García y otra trabayadora de la Embaxada, que van dir atendiendo a los españoles según lleguen a Katmandú. Pa ellos, caltiense l'encamientu de que se dirixan a les oficines de la constructora San José, cerca del aeropuertu.
Según relató'l ministru, yá se tán restableciendo les comunicaciones terrestres, los autobuses puen cruzar la frontera y les llinies aérees van poder dir restableciendo los vuelos, de manera que la situación va ser "más manexable".
