El conceyal d'Asciz pide "amparu" al fiscal xeneral del Estáu ante la decisión del alcalde d'Uviéu de quita-y el sueldu

UVIÉU, 19 de Payares (EUROPA PRESS)

El conceyal de l'Asamblea de Ciudadanos pola Izquierda (Asciz), Roberto Sánchez Ramos, presentó un escritu a la Fiscalía Xeneral del Estáu pidiendo "amparu" ante la decisión del alcalde d'Uviéu, Gabino de Lorenzo, de retira-y la co condición de lliberáu.

Nun escritu, Sánchez Ramos, rellaciona la decisión de De Lorenzo de dexalu sin sueldu col anunciu de la Fiscalía Xeneral del Estáu d'estudiar el so pidimientu d'apartar al fiscal xefe del Tribunal Superior de Xusticia d'Asturies de la investigación sobre la participación del alcalde na 'Yeguada Picos d'Europa'.

"El fechu de qu'esta decisión del alcalde tenga llugar coincidiendo col anunciu d'esta Fiscalía d'estudiar la denuncia lleva a sacar la conclusión qu'existe una rellación causa efeutu clara, siendo l'oxetivu del alcalde de facer callar a esti conceyal y a los más de 7.200 ciudadanos frente a los que debo responder", consta nel escritu.

Sánchez Ramos argumenta que la decisión del alcalde afeuta "desproporcionadamente al so grupu políticu" al contar con un únicu conceyal al que "se lu priva de sueldu y de la sovención del 90 por cientu asignada al grupu". "Tórgaseme desarrollar el llabor que me foi encargáu por más de 7.200 ciudadanos d'Uviéu", expunxo'l conceyal.

L'edil asegura que nestes condiciones nun va poder desarrollar el so llabor ya que'l so trabayu nel ayuntamientu p'asistir a les comisiones de plenos y poder consultar espedientes ocúpa-y ente les 8.30 y les 14.30 hores a los qu'hai que sumar l'atención a los vecinos y visites a los barrios que desarrolla poles tardes. "Too ello resulta evidentemente, incompatible con cualquier actividá llaboral", añadió.