BARCELONA, 31 de Xunetu (EUROPA PRESS)
L'Audiencia de Barcelona confirmó la condena a un porteru de discoteca d'un añu d'inhabilitación pa exercer esti oficiu y a una indemnización por daños al refugar a dos muyeres transexuales la entrada nuna discoteca.
Nun autu recoyíu por Europa Press, la estaya 21 de l'Audiencia de Barcelona refuga'l recursu d'apelación presentáu por Fernando H., nel qu'alegaba un error de valoración de la prueba, y consideró que "rescampla que se-yos refugó la entrada al llocal, discriminadamente por razón d'orde sexual".
Añade l'Audiencia que'l datu de que'l condenáu tenga una fía transexual, "nun esclúi los fechos delictivos", pue repite que nun-yos permitió entrar pola condición sexual de les perxudicaes.
Según informó la Fiscalía de Barcelona cuando en marzu'l xulgáu dictó'l fallu, tratóse de la primer sentencia conocida n'España na que s'aplica l'artículu 512 del Códigu Penal pa esti tipu de fechos.
Esti artículu del Códigu Penal refierse a los profesionales que deniegan a una persona una prestación a la que tenga derechu "por razón de la so ideoloxía, relixón o creencies, la so pertenencia a una etnia, raza o nación, el so sexu, orientación sexual, situación familiar, enfermedá o minusvalía", pa los qu'establez penes d'ún a cuatro año d'inhabilitación.
Esti casu pasó sobre les dos de la madrugada del 30 d'ochobre del 2011, cuando'l porteru, de la discoteca Get Back de la cai Aribau de Barcelona, nun dexó entrar a les muyeres argumentando que "el so xefe nun quería entemecer los ambientes", n'alusión a la so condición de transexuales.
Ésa foi la segunda de les escuses dao que, de primeres, díxo-yos que nun podíen entrar porque l'aforu taba llenu, anque siguíen entrando más persones al llocal, según los fechos que la sentencia consideró probaos.
L'acusáu, responsable de la puerta, declarara nel xuiciu que "ye padre d'una moza transexual y nun tien prexuicios", que trabayaba na discoteca dende 1983, y que nun se-yos dexó entrar por problemes d'aforu.
