La conseyera de Cultura y Turismu pasa a presidir al Patronatu de la Fundación La Llaboral

Dimite Erich Berger como comisariu xefe del Centru d'Arte y Creación Industrial

UVIÉU, 29 d'Avientu (EUROPA PRESS)

La nueva conseyera de Cultura y Turismu del Principáu d'Asturies, Mercedes Álvarez González, asumió güei, a propuesta del actual Presidente y cola unanimidá de tolos patronos, la presidencia de la Fundación La Llaboral Centru d'Arte y Creación Industrial (Xixón), según informaron fontes de Llaboral al traviés d'una nota prensa.

Mercedes Álvarez (Xixón, 1958), ye llicenciada en Filolosofía pola Universidá d'Uviéu y foi conceyala de Cultura y Universidá del Conceyu de Xixón ente 1999 y 2007, añu en que foi elixida diputada autonómica. La conseyera, que sustitúi como tal a Encarnación Rodrgíuez Cañas, recibió la bienvenida del restu de los patronos de la Fundación que, de la mesma manera, agradecen al Presidente saliente, Jesús Manuel Hevia-Aza Fernández, el so trabayu y dedicación demientres los meses en qu'ocupó'l cargu.

El Patronau de la Fundación queda asina integráu poles siguientes Mercedes Álvarez González (Presidenta), Jorge Fernández León (Vicepreisdente), Nicanor Fernández (Vicepresidente segundu); José Pedreira (secretariu) y Juan Cueto Alas y Agustín Tomé Fernández, Ministeriu de Cultura, Ayuntamientu de Xixón, Autoridá POrtuaria, Caxa d'Aforros d'Asturies, Fundación Telefónica, Sedes S.A. (vocales), amás d'Alcoa (miembru corporativu estratéxicu) y Constructora San José, Dragados, Duro Felguera y FCC (miembros corporativos asociaos).

Amás, el Patronatu aportó l'informe presentáu pola Directora de Llaboral, Rosina Gómez-Baeza, sobre'l grau d'execución del Plan d'Actuación del 2008, asina como'l presupuestu que va tener el Centru d'Artes nel añu 2009.

DIMISIÓN

Per otru llau, el Patronatu de la Fundación La Llaboral aceptó la dimisión d'Erich Berger como Comisariu Xefe del Centru. Berger va dexar el so puestu'l próximu día 31 de xineru. El máximu órganu rector del Centru d'Artes y Creación Industrial acordó abrir, darréu, un nuevu procesu de seleición y concurrencia pública pa cubrir el cargu que va quedar vacante.

Los patronos de Llaboral espresaron el so agradecimientu a Erich Berger pola so contribución al desarrollu del proyeutu de La Llaboral. Berger va incorporase, como director téunicu, a un proyeutu internacional d'investigación sobre la moda y les nueves teunoloxíes que desarrolla prototipos "vestibles" que, a cortu plazu, van tornar en productos comerciales, según informó Llaboral. Tamién va trabayar cola Asociación Finlandesa de Bioarte nun proyeutu sobre'l cambiu climáticu nel que se rellaciona arte y ciencia, desarrolláu na Estación Kilpisjarvi de Laponia/Finlandia de la Universidá de Helsinki.