El Constitucional llevanta la suspensión del impuestu catalán a los depósitos bancarios

BARCELONA/UVIÉU, 23 de Mayu (EUROPA PRESS)

El Tribunal Constitucional (TC) llevantó la suspensión del impuestu sobre depósitos d'entidaes de creitu en Catalunya decretada en xineru, cuando almitió a trámite un recursu d'inconstitucionalidá presentáu pol Gobiernu central contra la iniciativa de la Generalitat.

Nun autu de 16 páxines con fecha del 21 de mayu, el Constitucional avala'l gravame "nun momentu de fuertes recortes presupuestarios, obligaos pa encarar les actuales esixencies de reducción del déficit y del endeudamientu de la comunidá autónoma de Catalunya".

Nel primer plenu ordinariu de la X llexislatura, el conseller d'Economía y Conocencia de la Generalitat, Andreu Mas-Colell, presentó esti impuestu col que prevén recaudar 500 millones d'euros, y que foi frutu del acuerdu de gobernabilidá de CiU y ERC.

L'Abogacía del Estáu, en representación del Gobiernu, pidió caltener esta suspensión porque llevantala podría "xenerar perxuicios irreparables pa les entidaes de depósitu suxetes al pagu del tributu", y sería una torga pa particulares y empreses, daes les dificultaes actuales p'acceder a creitos.

Tamién pidió'l caltenimientu de la suspensión alegando qu'otres comunidaes autónomes podríen imponer impuestos asemeyaos, pero'l Constitucional refugó esti argumentu por ser "una mera hipótesis non confirmada".

Amás, el tribunal detalla que'l Gobiernu central tamién creó un impuestu estatal sobre los depósitos bancarios a tipu cero, colo qu'esbarata l'argumentu de que la iniciativa catalana puea espandise al restu del les comunidaes autónomes.

Precisamente, contra esti impuestu estatal presentaron recursos tamién la Generalitat y el Parlament que'l Constitucional almitió a trámite en mayu y ta pendiente de resolución.

En cuanto al impuestu catalán, el Parlament solicitó'l so llevantamientu al considerar que l'impuestu ye "una midida necesaria p'algamar nueves fontes de financiación que permitan cumplir los oxetivos de déficit y deuda pública", y asegurar a los ciudadanos la prestación de servicios que dependen de la Generalitat.