SEÚL, 20 d'Abril (Reuters/EP)
Corea del Norte llanzó una nueva alvertencia a Estaos Uníos ante la posibilidá de que l'Alministración de Donald Trump intervenga militarmente na península coreana. "Nun tendríeis que metevos con nós", reza un artículu publicáu esti xueves pol diariu oficial 'Rodong Sinmun'.
"Nel casu de que llancemos un súper ataque preventivu, va barrer completa y darréu non solo a les fuerces invasores imperialistes d'Estaos Uníos en Corea de Sur y la so contorna, sinón tamién el territoriu continental d'Estaos Uníos y va estrapallalo", afirmó.
El réxime de Kim Jong Un respuende asina a les palabres del vicepresidente norteamericanu, Mike Pence, que nuna reciente xira asiática que lu llevó a Corea del Sur declaró que "la era de la paciencia estratéxico" con Pyongyang acabó, planteando una eventual acción militar como les llevaes a cabu nes últimes selmanes en Siria y Afganistán.
El presidente de la Cámara de Representantes, Paul Ryan, confirmó estes sospeches, revelando que la opción militar ta sobre la mesa. "Dexar a esti dictador que tenga esti tipu de poder nun ye daqué que les naciones civilizaes puean faer", dixo dende Londres, onde ta de visita oficial.
Pela so parte, el secretariu d'Estáu, Rex Tillerson, antemanó nes últimes hores qu'Estaos Uníos "ta revisando l'actual estatus de Corea del Norte, lo mesmo como patrocinador del terrorismu como n'otros senes que puean aumentar la presión sobre'l réxime" pa que vuelva a les negociaciones pa la desnuclearización de la península coreana.
Los últimos llanzamientos de misiles balísticos y pruebes nucleares levaos a cabu pol Gobiernu de Kim Jong Un dispararon la tensión na rexón y emburriaron a l'Alministración Trump a adurecer la so política hacia Corea del Norte, tres años d'una lenta escalada na rexón.
Como exemplu de los renovaos resfregones ente Washington y Pyongyang, Estaos Uníos anunció l'envíu del portaaviones 'USS Carl Vinson' a agües de Corea del Norte, sicasí, darréu la Casa Blanca esclaró, arriendes d'informaciones periodístiques, qu'en realidá'l so destín yera Australia.
