UVIÉU, 20 Oct. (EUROPA PRESS) -
El Conceyu de Corvera mantién abiertu'l plazu pa inscribise nel Cursu Avanzáu de Llingua Asturiana que va empezar les sos sesiones el martes 24 d'ochobre. Hasta esi día, la población adulta va poder inscribise nos rexistros municipales.
Como n'ediciones anteriores, esti cursu ye de baldre y súmase a otres iniciatives municipales de promoción, divulgación y apoyu a la llingua asturiana, como los talleres de llectura n'asturianu o los alcuentros lliterarios, que s'entamen regularmente al traviés de la Casa de la Llingua de Corvera en delles feches, a lo llargo de too l'añu.
Esti nuevu cursu pretende ser un mecanismu de profundización na conocencia y aprendizaxe de la gramática asturiana y otres cuestiones del idioma pero tamién una manera d'averase a la cultura asturiana. Les clases van ser impartíes pol técnicu responsable del Serviciu de Normalización Llingüística de Corvera.
El cursu tien una duración de venti hores y va desenvolvese en sesiones de dos hores tolos martes, n'horariu de 18.00 a 20.00 hores. Les sesiones del cursu, que van empezar el martes 24 d'ochobre y van acabar el martes 19 d'avientu, van realizase na Aula 2 del Centru Sociocultural de Les Vegues.
