UVIÉU, 16 Ene. (EUROPA PRESS) -
La presidenta de Foru Asturies, Cristina Coto, pidió esti martes al conseyeru d'Infraestructures, Ordenación del Territoriu y Medioambiente, Fernando Lastra, qu'asuma la competencia del so departamentu na construcción de l'Autovía del Suroccidente, en vez de "engañar" al ministru del ramu diciéndo-y que la competencia ye estatal.
Nuna rueda de prensa, la tamién portavoz de Foru nel parllamentu asturianu recordó que l'autovía dende La Espina hasta Ponferrada ye "de competencia autonómica" y qu'afecta a los executivos d'Asturies y de Castiella y Llión.
"El Gobiernu tien la obligación d'exercer les sos competencies nel impulsu de la infraestructura", sorrayó Coto. Por eso, el so grupu parllamentariu va presentar na Xunta Xeneral una Proposición Non de Llei (PNL) na que va encamentar al Principáu a ellaborar un calendariu d'actuaciones qu'entienda los estudios y proyectos, la execución por tramu y la puesta en funcionamientu de l'autovía dende La Espina a Tinéu, Cangas y Degaña.
"Enxareta-y" la competencia al ministru de Fomentu ye, al so xuiciu, "un trucu bien conocíu n'Asturies", al igual que'l "desdexu" del Principáu poles infraestructures.
"Si Lastra quier reclamar daqué al Gobiernu d'España tien munches opciones nesta zona, por exemplu, la urxencia de siguir los tramos Corniana-Salas y Salas-La Espina de l'A-63, que sí son competencia de Fomentu", señaló.
Pa Foru la infraestructura tien especial relevancia al considerar que la vertebración d'Asturies al travíes de les comunicaciones ye "una necesidá vital", especialmente pal suroccidente, que "reclama y merez con toa xusticia'l derechu a superar l'aislamientu históricu que sufre dende hai sieglos".
La iniciativa parllamentaria contempla amás la dotación presupuestaria pa la infraestructura al travíes del proyectu de creitu estraordinariu que'l Gobiernu tendrá que llevar a la Xunta Xeneral pola situación de prórroga presupuestaria vixente.
Foru encamienta amás al Principáu a promover un alcuerdu cola Xunta de Castiella y Llión pa dar continuidá a l'autovía hasta'l so enllaz cola A-6.
