Coto (Foru) recuerda a Fernández qu'herada una "envidiable" situación financiera

UVIÉU, 23 de Mayu (EUROPA PRESS)

La vocera de Foru na Xunta Xeneral d'Asturies (XXPA), Cristina Coto, díxo-y esti miércoles al candidatu del PSOE a la Presidencia, Javier Fernández, que va heredar una "envidiable" situación financiera, frutu de la xestión del Executivu esti añu en funciones, lideráu por Francisco Álvarez-Cascos.

"Usté recibe como herencia del Gobiernu de Foru una envidiable situación financiera, con superávit presupuestariu a fecha de güei, lo contrario que'l so partíu dexó va un añu: un déficit que doblaba les llendes autorizaes, y una deuda aparcada en cuentes de gastos movíos o simplemente ocultos nos caxones de delles conseyeríes, principalmente la de Sanidá", señaló Coto na so intervención na sesión plenaria d'elección de presidente.

En llamentando que'l PSOE nun collaboró col Gobiernu de Foru estos meses atrás, Coto dixo que'l so grupu parlamentariu nun va responder col principiu de 'güeyu por güeyu, diente por diente'. Nun ye porque los socialistes asturianos nun lo merezan, dixo Coto, sinón porque "nun lo merecen los asturianos".

Asina, como segunda fuerza política nel parlamentu asturianu, Coto brindó la so collaboración p'apoyar al futuru Gobiernu d'Asturies ante'l Ministeriu de Facienda, y qu'Asturies cuente con un Plan Económicu y Financieru (PEF) 2012-2014, tres el refugu del que s'enviara nel últimu Conseyu de Política Fiscal y Financiera (CPFF).

Eso sí, Coto dixo qu'esi PEF nun hai d'incluyir recortes "innecesarios presupuestariamente" y "dañibles socialmente" en materies como educación y sanidá. "España ye un Estáu de Derechu, nun ye Arxentina nin Venezuela pa espoliar arbitrariamente a nenguna empresa nin pa intervenir discrecionalmente a una comunidá autónoma o conceyu", alvirtió la diputada de Foru.

"¿Por qué en sanidá o n'educación o en salarios de los funcionarios o en pensiones y non en medios públicos audiovisuales, gastos suntuarios y innecesarios, organismos y patronatos públicos gastizos o n'otres partíes de los presupuestos d'un país o d'una rexón?", preguntó Coto en relación a los recortes.

Asina, Coto ofreció-y el so apoyu p'apoyar al Gobiernu asturianu nos recursos d'inconstitucionalidá presentaos frente al Real Decretu Llei de midíes urxentes de recortes n'educación y en sanidá, porque "invaden" competencies propies d'Asturies, y "contravienen el principiu d'igualdá".

Dende Foru consideren que Fernández va recibir unos "presupuestos envelenaos", pero qu'eso ye "algo que se produz por voluntá propia", al apoyar en xineru la "irresponsable" enmienda a la totalidá que'l PP presentó contra'l proyectu de cuentes públiques qu'intentaba sacar alantre'l Gobiernu.

"Aquellos Presupuestos pal 2011 del Gobiernu del so partíu y de los sos socios d'IU, inservibles por falsos, por ironía de la vida política son agora los sos presupuestos, los que va tener que xestionar porque usté asina lo quiso", díxo-y Coto al candidatu.

La vocera de Foru quexóse del "bloquéu" que sufrió'l Gobiernu de Cascos, que vio cómo se-y negaba la posibilidá d'empeñase y que vio cómo hasta se-y retiraben les sos competencies ordinaries en materia de xestión presupuestaria. "Asturies perdió un tiempu preciosu", llamentó. Y recordó que la Sindicatura de Cuentes yá tien los datos del estáu real d'execución del Presupuestu del Principáu, qu'ofrez un superávit de 57 millones.

MINERÍA

Per otru llau, Coto tamién dixo que va apoyar al Gobiernu pa que siga col recursu contenciosu presentáu ante l'Audiencia Nacional pa torgar política, y xurídicamente la eliminación de los fondos mineros.

"Amás de constituyir una decisión drástica inasumible p'Asturies, esta eliminación de fondos resulta contraria al principiu constitucional de solidaridá, y a la distribución equitativa de la renta rexonal n'España, porque liquiden les principales alternatives de desarrollu d'unes cuenques mineres que yá pagaron la so parte del contratu", dixo Coto.

ENTENTE

Na parte inicial del so discursu, Coto reprochó a los socialistes que pactaren col PP na pasada llexislatura, lo que vino dar continuidá a l'alianza "inconfesable" existente n'Asturies ente PSOE y PP, que calificó de "entente cordial" o "pactu del duernu". Acusó a los dos grandes partíos d'atrabancar el "cambiu" qu'intentaba'l PP.

"Tres doce años de gobiernos socialistes y con usté sentáu nesos bancos y dirixendo tamién la FSA, y con ocho años de gobiernu socialista n'España, Asturies ye la rexón con mayor nivel de decadencia de toa España", añadió, de la que foi pidiendo respuestes concretes sobre los planes sobre'l so futuru gobiernu.