UVIÉU, 3 de Xunu (EUROPA PRESS)
La presidenta y vocera de Foru na Xunta Xeneral, Cristina Coto, argumentó esti vienres el votu de la so formación a la candidata del Partíu Popular, Mercedes Fernández, pa la presidencia del Principáu, porque "la candidatura de Javier Fernández ye la peor opción de les posibles, a la vista de la so trayectoria, del so balance como Presidente y de la so escasa voluntá de cambiu espresada nel alderique d'investidura"
"Esta decisión reflexa a lo último les nueses fondes diferencies d'estilu, de coherencia y de comportamientu col PP, que nin nel 2011 nin nel 2012 foi capaz d'apoyar a Foru pa sumar votos abondo que podíen facer realidá'l cambiu necesariu n'Asturies cola mayoría de 26 diputaos na cámara", señala.
Coto realizó estes manifestaciones a los periodistes en rematando la segunda votación na Xunta Xeneral del Principáu pa escoyer al nuevu presidente d'Asturies tres les elecciones del 24 de mayu. Nesta votación el candidatu socialista Javier Fernández y la candidata del Partíu Popular Mercedes Fernández empataron esti vienres a 14 diputaos, al contar la 'popular' colos trés votos de los diputaos de Foru y l'astención de Podemos ya IU.
Coto señala que cola decisión adoptada esti vienres pol so grupu quedó claro que "en Foru nun practicamos el güeyu por güeyu; diente por diente', porque aspiramos a ser meyores y non simplemente iguales que les demás fuerces polítiques competidores"
Y sorrayó "les coincidencies programátiques col PP que son les mesmes yá existentes nel 2011 y nel 2012, y tamién les series discrepancies que nos merez la so falta de compromisu pa defender los intereses d'Asturies frente al Gobiernu d'España".
La presidenta del PP y candidata del partíu a la presidencia del Principáu, Merced Fernández, manifestó pela so parte que mientres los próximos díes va tratar de forfugar los tiempos pa llograr los apoyos que-y permitan gobernar Asturies.
"Dende'l PP vamos intentar con toa humildá, cenciellez ya ilusión tratar de siguir avanzando y llogrando apoyos na Cámara porque tenemos la ilusión d'ofrecer un cambiu nesta rexón a lo que fueron los gobiernos anteriores, un cambiu qu'apueste pol empléu, la rexeneración democrática fondo y por Asturies sin complexos", dixo.
Mercedes Fernández dio les gracies a los trés diputaos de Foru por da-y el so apoyo ya indicó que-y "fizo muncha ilusión". A la entruga de si lo asocedío esti vienres supón el zarru de les firíes ente'l centru derecha na rexón, Mercedes Fernández mostróse convencida de qu'entama "una nueva etapa". "En concencia nós l'ánimu que tenemos ye buscar la coincidencia y los puntos que mos unen a diferencia de los que puean separanos", dixo.
El voceru de Ciudadanos, Nicanor García, pela so parte, destacó que'l so grupu caltién la coherencia y mostró la so disposición a negociar con ambos partíos de los candidatos en pugna, PSOE y PP.
