UVIÉU, 22 Jun. (EUROPA PRESS) -
La ex portavoz de Foru nel parllamentu asturianu, Cristina Coto, presentó esti vienres un escritu a la Mesa de la Cámara de la Xunta Xeneral del Principáu arrenunciando al so escañu depués de tener dellos desalcuentros colos sos compañeros de bancada y col secretariu xeneral del partíu, Francisco Álvarez Cascos.
Por un requisitu formal del funcionamientu de la Cámara asturiana, Cristina Coto va comparecer la selmana próxima énte la Mesa pa ratificar de voz la so decisión, según informaron a Europa Press fontes del partíu.
Coto, presentó'l vienres pasáu la so dimisión como presidenta del partíu, de la que manifestó la so decisión d'abandonar toles sos obligaciones al frente del grupu parllamentariu del so partíu na Xunta Xeneral del Principáu.
El debate y el puntu de resquiebra nel senu del partíu surdió depués de que Coto decidiera cambiar el contratu d'una trabayadora del grupu pa paga-y a xornada completa. La decisión de l'hasta agora portavoz causó una contestación nel partíu y nuna xunta de la Comisión Directiva de Foru, na que participó Cascos, decidió comunicase al grupu vía burofax qu'anulara tala decisión.
Coto esplicó nel so momentu que toles decisiones en materia de personal nel grupu tomóles ella d'alcuerdu con Cascos. Nun intervenía pa nada la Comisión Directiva. "La única diferencia que presenta esti casu ye que'l mio secretariu xeneral discrepó de la decisión que tomé", indicó n'alusión a Cascos.
