Cuarta xornada siguida d'ataques israelís sobre Gaza mientres la infantería espera la orde d'invasión

Reuters

GAZA, 30 d'Avientu (Reuters/EP)

Polo menos diez palestinos morrieron güei y cuarenta resultaron firíos por mor d'un nuevu ataque de la fuerza aérea israelí escontra dellos edificios del Gobiernu de Hamas na Franxa de Gaza nel cuartu día siguíu de la ofensiva militar na zona, mientres cientos de tanques israelís esperen la orde d'invasión nes puertes de la ciudá.

Los misiles israelís atacaron cinco edificios ministeriales y una construcción perteneciente a la Universidá Islámica de Gaza, según informaron fontes méliques y dellos testigos qu'esplicaron qu'ente los muertos tán dellos guardes de seguridá y civiles. Los equipos de rescate trabayaben hores dempués del ataque p'alcontrar a más víctimes que quedaren atrapes ente los escombrios.

De la mesma manera, un centru deportivu y dos campos d'entrenamientos pertenecientes al Movimientu de Resistencia Islámicu (Hamas) quedaron destruyíos tres l'últimu d'una ccadena d'ataques mientres nun dexen de rexistrase esplosiones en tola ciudá de Gaza.

Hasta'l momentu, yá son más de 350 los palestinos muertos nes ofensives aérees siguíes que l'Exércitu israelí desarrolló na Franxa. Según l'axencia de noticies de Naciones Uníes, polo menos 62 de les víctimes mortales son civiles. Per otru llau, una muyer israelí morrió tres l'impautu d'un cohete llanzáu dende la Franxa de Gaza na ciudá d'Ashadod, y con ella son los tres isarelís muertos nes últimes hores.

INVASIÓN TERRESTRE

L'Exércitu israelí se prepara pal asaltu terrestre na franxa palestina, que foi declarada zona restrinxida por Tel Aviv, a la espera de que les autoridaes d'aquel país dean la orde pa entrar n'aición.

Previamente, el ministru de Defensa Israelí, Ehud Barak, afirmó ante la Knesset, el parlamentu israelí, que la ofensiva militar diba ser tan amplila y intensa como fuere necesario y responsabilidzó a Hamas "de too lo que pase en Gaza y de les sos consecuencies".