MADRID, 9 d'Ochobre (EUROPA PRESS)
El Comité Nobel Noruegu galardonó col Premiu Nobel de la Paz al Cuartetu de Diálogu Nacional de Túnez pola so "contribución decisivo" a la construcción "d'una democracia plural" nel país magrebín tres la revolución del 2011.
El Cuartetu, constituyíu nel branu del 2013, ta formáu por cuatro organizaciones de la sociedá civil: la central sindical UGTT, la patronal UTICA, el sindicatu d'abogaos y la Lliga Tunecina pa los Derechos Humanos.
Estes organizaciones representen "dellos sectores y valores" de la sociedá tunecina y, uníes, defendieron la transición política "nun momentu nel que'l país taba nel cantu de la guerra civil", destacó'l comité noruegu pa xustificar el galardón.
El llabor del grupu foi clave pa que Túnez avanzara hacia un sistema constitucional que "garantiza los derechos fundamentales de tola población, independientemente del so xéneru, ideoloxía política o creencia relixosa". El Comité sorrayó que premia al Cuartetu nel so conxuntu y non a les organizaciones individuales.
PRIMAVERA ÁRABE
Túnez foi l'orixe de la Primavera Árabe y, en contra de lo asocedío n'otros países d'Oriente Próximu y el norte d'África, dio pasos n'ares d'una "transición democrática". "Un factor esencial" nesti desarrollu tuvo llugar l'añu pasáu, cuando'l país celebró elecciones pacífiques qu'acabaríen desaguando nuna nueva Constitución.
El Comité Nobel Noruegu aseguró que'l Cuartetu fomentó'l diálogu pacíficu "ente ciudadanos, partíos políticos y autoridaes" y ayudó a "construyir soluciones basaes nel contestu pa un ampliu abánicu d'asuntos". Gracies a esti diálogu, pudo frenase una violencia qu'amenazaba con baltar la Revolución de los Xazminos.
Pal Comité, la transición tunecina entamada tres el fin del réxime de Zine el Abidine Ben Alí ye "única" pola unidá ente movimientos laicos y relixosos y pola implicación "clave" d'organizaciones y intituciones de la sociedá civil.
El Comité Noruegu espera que la concesión del Nobel de la Paz al Cuartetu de Diálogu contribuya a "salvaguardar la democracia en Túnez" y a valga de "inspiración" pa los que quieren promover la paz n'otres partes del mundu.
