MADRID, 17 d'Avientu (EUROPA PRESS)
Les autoridaes de Cuba dexaron en llibertá al contratista estaounidense Alan Gross, deteníu na isla dende va cinco años, según adelantó la cadena ABC News, que tamién informó de la escarcelación de los trés espíes cubanos que permanecíen presos.
Gross, de 65 años, ye un antiguu subcontratista de l'Axencia d'Estados Uníos pal Desarrollu Internacional (Usaid) y cumple condena porque, según les autoridaes de la isla, introduxo equipos d'alta tecnoloxía col envís d'establecer de manera illegal el serviciu d'Internet.
A primeros d'avientu, nel quintu aniversariu de la detención de Gross, la Casa Blanca alvirtió de qu'esti casu suponía una "torga" pa que Washington y L'Habana caltengan relaciones "más constructives". El presidente norteamericanu, Barack Obama, tien previsto anunciar esti miércoles pela tarde cambios na política escontra la isla, según dellos medios.
CONDICIONES
El réxime de Raúl Castro señaló en delles ocasiones qu'esta lliberación namás podía llegar tres un acuerdu con Estaos Uníos qu'incluyera la lliberación de dellos supuestos espíes cubanos encarcelaos en suelu estaounidense.
Estos espíes, conocíos pol nomatu de 'los cinco' --de los que namás trés siguen deteníos--, quedaron arrestaos en 1998 y condenaos nel 2001 por espionaxe. Tán consideraos unos héroes en Cuba porque se-yos atribúi la infiltración en redes terroristes cubano-estaounidenses pa evitar atentaos na isla.
