Cuervas-Mons diz que'l "únicu efeutu multiplicador" qu'algama la Sociedá de Promoción ye'l de cargos públicos

El PP destaca que'l director del Idepa, Víctor González Marroquín, participa en polo menos seis conseyos d'Alministración

UVIÉU, 19 de Payares (EUROPA PRESS)

El PP volvió a cargar güei escontra la xestión del Executivu socialista y la "falta de tresparencia de los diversos chiringuitos" del Gobiernu de Vicente Álvarez Areces. El diputáu 'popular' José Agustín Cuervas-Mons aseguró que l'únicu efeutu multiplicador de les ayudes de la Sociedá Rexonal de Promoción ye'l de "directivos y cargos públicos al mandu d'entidaes".

Cuervas-Mons referíase d'esa manera a la respuesta del Gobiernu a les crítiques del PP sobre'l destín de les sos inversiones y esclarió nun comunicáu que'l porcentaxe dirixíu a empreses participaes mayoritariamente pol sector públicu ye'l de 46 por cientu, y non del 54 por cientu como apuntaron los diputaos del PP. Amás, indicaron que con eses ayudes s'algama "un efeutu multiplicador" na promoción económica.

En rueda prensa'l diputáu 'popular' afirmó que "nun ta dispuestu a discutir si ye un 54 o un 46% el porcentaxe dirixíu a empreses públiques, porque seya ún o otru eso ye una mala política", y añadió que lo que sí comparte ye l'efeutu multiplicador, pero de los cargos públicos.

Nesti sen, indicó qu'esi efeutu multiplicador tien tmaién "nome y apellíos: Víctor González Marroquín". Y ye que'l diputáu del PP afirmó que "el director del Idepa siéntase en polo menos seis conseyos d'Alministración", dalgo que consideró "ridículu".

"Marroquín ye director del Idepa, presidente de la SRP, presidente d'Asturgas, vicepresidente del CTIC, presidente del CEEI y presidente d'Inverasturias, ente otres entidaes", dixo Cuervas-Mons, que s'entrugó "d'ónde saca'l tiempu ente viaxes y conseyos d'Alministración".

El PP volvió solicitar al Gobiernu qu'esclarie nel Parlamentu la situación y evolución de toos estos organismos públicos pa que "los asturianos sepan qué pasa con toes eses sociedaes inactives". Nesti sen, el diputáu del PP recordó que nel 2005 la SRP participaba en 63 empreses, 40 d'elles actives y 23 en procesu de disolución, mientres que nel 2007 participa en 31 empreses.

A xuiciu de los 'populares' tamos ante un modelu de xestión "instauráu por Areces, que ye un auténticu fracasu, puesto que ta basáu nun númberu interminable d'empreses públiques ayenes al control públicu".