UVIÉU, 30 Sep. (EUROPA PRESS) -
Col oxetivu doble de sofitar el llabor docente del profesoráu de Llingua Asturiana/Gallego-asturianu y amosar al alumnáu la rica creación musical, lliteraria o teatral que s'espresa nestes llingües, la Conseyería de Cultura convoca un añu más l'Axenda Didáctica Escolar. Nel cursu pasáu fueron 182 los centros de Primaria y Secundaria que se beneficiaron d'esti programa educativu.
Asina, cola publicación d'estes normes nel Boletín Oficial del Principáu d'Asturies del 30 de setiembre, ábrese un plazu d'un mes (del 1 al 31 d'ochobre) pa que les empreses privaes d'ámbitu asturianu dedicaes a la producción cultural presenten proyectos pa desenvolver nes distintes etapes educatives.
En rematando'l plazu de presentación de proyectos, va ufiertase a tolos centros educativos públicos y concertaos d'Asturies un programa ampliu d'actividaes nel que van tener cabida les actuaciones lliteraries, musicales, teatrales, cuentacuentos, monólogos* y que van llevase alantre nel trescursu d'esti añu escolar.
