Aviso: Esta noticia tiene más de un año. Última actualización: 27/10/2009 11:22
David Artime Coto (Candás) y Carlota Fernández-Escandón Vázquez (Xixón) son los dos ganadores de la quinta edición del concursu lliterariu de microrrelatos 'Minimorum', que tolos años convoca'l periódicu asturianu La Voz de Asturias, en collaboración cola Conseyería de Cultura del Principáu d'Asturies.
La decisión del xuráu, que tamién reconoció dos segundos premios pa Mauricio Díaz Rodríguez (Uviéu) n'asturianu, y Rafael Sánchez Avello (Uviéu) en castellán, publicólu güei esti diariu nes sos páxines de la estaya de cultura.
Los premios fallólos ayeri, tres el correspondiente conceyu, el xuráu, compuestu pol catedráticu de la Universidá d'Uviéu, Lluis Xabel Álvarez, el profesor de la mesma institución, Aurelio González Ovies, el periodista Carlos Rodríguez, el representante de la Conseyería de Cultura, Luis Casteleiro, y el director de La Voz de Asturias, Luis Mugueta, amás del director xerente del grupu Zeta Asturies, Joaquín de la Buelga.
A la edición d'esti añu presentáronse un total de 200 relatos cortos que, según publica La Voz, procedíen de dientro y de fuera d'Asturies, y hasta d'otros países. Los mesmos, según les bases, nun podíen sobrepasar les 125 palabres nin los 1000 caracteres d'estensión, y debíen tener con temática argumental l'actual contestu de crisis económica. Asina, debíen incluyir les palabres crisis y futuru obligatoriamente nel testu.
Los primeros premios tán datos con 500 euros caún. Amás, los dos premiaos de la versión asturiana llevarán un llote de llibros d'ediciones B y la colección de DVD 'Enciclopedia Audiovisual de la Cultura Popular Asturiana. Pela so parte, los dos ganadores de la versión castellana, llevarán el llote de llibros más la colección de DVD 'Memoria de un pasado reciente'.
La entrega de premios será'l xueves, 29 d'ochobre, nes dependencies de la Voz. Los relatos ganadores y finalistes publicaránse'l próximu domingu, 1 de payares, nes páxines nel diariu asturianu.