UVIÉU, 25 Abr. (EUROPA PRESS) -
La Xunta pola Defensa de la Llingua Asturiana (XDLA) convoca pa esti vienres 4 de mayu, coincidiendo col Día de les Lletres Asturianes, una manifestación nueva pola oficialidá del asturianu. La convocatoria tien el lema de 'L'asturianu llingua oficial ¡yá!'.
Va ser dos selmanes depués de la movilización d'esti 21 d'abril, qu'axuntó n'Uviéu a miles de persones --30.000 según la organización y 5.000 según la policía local-- y que pidía a los partíos políticos qu'abrieren yá la reforma del Estatutu d'Autonomía pa incluyir la oficialidá del asturianu y del gallego-asturianu.
Sicasí, esta manifestación nueva coincidiendo col Día de les Lletres, el primer vienres de mayu, vien convocándola la Xunta pola Defensa de la Llingua Asturiana dende 1987. La manifestación, al igual que la del sábadu pasáu, va salir de la Estación del Norte d'Uviéu a les 19.30 hores, anque en cuenta de rematar na Plaza de la Catedral va terminar a les puertes del Teatru Campoamor.
Ellí, a les 20.30 hores, va empezar l'actu institucional de l'Academia de la Llingua Asturiana, onde'l presidente de la institución, Xosé Antón González Riaño, va dar el so primer discursu a la sociedá asturiana, depués d'asoceder nel cargu a Ana Cano, que llevaba dirixiendo l'Academia dende'l 2001.
