UVIÉU, 22 de Xunetu (EUROPA PRESS)
La Delegación de Gobiernu comunicó al Conceyu de Noreña l'anulación de la so ordenanza municipal d'usu de la llingua asturiana, por entender que supón reconocer el calter oficial de la mesma, un algame non previstu nin na Llei de Promoción y Usu del Asturianu nin nel Estatutu d'Autonomía.
Nuna carta fechada'l pasáu 19 de xunetu, Delegación espón unes razones asemeyaes a les argumentaes na anulación de la ordenanza municipal del asturianu del Conceyu de Carreño. Concretamente, recuerda, basándose na Llei de Promoción y Usu, que les comunicaciones orales o escrites de los ciudadanos son válides cola Alministración autonómica pero non colos Conceyos.
Señala tamién la imposibilidá de redactar actes de xuntes municipales en llingua asturiana, por nun ser ésta una llingua de calter oficial, y remítese de la mesma manera a la Constitución Española.
Por estos motivos, Delegación da un plazu d'un mes al Conceyu de Noreña pa que proceda a l'anulación de la citada ordenanza municipal.
RESPUESTA DE L'ACADEMIA
L'Academia de la Llingua Asturiana emitió un comunicáu criticando esta "nueva postura anti-asturiana del Delegáu de Gobiernu, Sr. Gabino de Lorenzo", que "fraya dafechu los principios llegales calteníos na Llei d'Usu del Asturianu del añu 1998".
Concretamente, recuerda que l'Artículu 4 de la norma "conseña la validez del empléu d'esta llingua nes comunicaciones orales o escrites de los ciudadanos nel Principáu d'Asturies y l'Artículu 8 onde s'afita l'usu del asturianu nos Conceyos".
Recuerda amás que "son munchos los Conceyos qu'a lo llargo d'estos años aprobaron ordenances que vienen regulando l'usu del asturianu nel so ámbitu municipal ensin nengún conflictu y nun s'entiende por qué agora se tomen esti tipu de midíes qu'atrabanquen los derechos llingüísticos de los asturianos, que nun pueden exercer con llibertá y ensin imposiciones l'usu de la so llingua".
