El desemplegu aumenta en 4.334 persones en payares n'Asturies, un 8,04 por cientu más que'l mes anterior

La contratación nel Principáu rexistró un descensu del 25,07 por cientu

UVIÉU, 02 d'Avientu (EUROPA PRESS)

El paru aumentó en payares n'Asturies en 4.334 persones, lo que supón una subida del 8,04 por cientu en comparanza col mes anterior y eleva'l númberu de desemplegaos na rexón a 58.251, según los datos espardíos güei pol Ministeriu de Trabayu y Inmigración recoyíos por Europa Press. L'incrementu del paru a nivel nacional asitióse nel 6,08.

Amás, en rellación a payares del 2007, el desemplegu n'Asturies aumentó un 16,16 por cientu del conxuntu estatal.

Por sexos, del total de paraos, 32.316 son muyeres, y 25.935 son homes. De la mesma manera, el númberu de persones inscrites nes oficines d'emplegu con menos de 25 años s'eleva a 6.466.

En cuanto a sectores, el de servicios concentra'l mayor númberu de desemplegaos, que nel mes de payares elevóse a 38.226 al rexistrar un incrementu de 2.546 paraos más, siguíu d la construcción, con 8.264 con un aumentu de 1.069 y el de la industria con 6.270 y un aumentu de 467 paraos. El colectivu ensin emplegu anterior asciende a 4.725 y el sector de l'agricultura concentra 716 paraos.

En cuanto a la contratación, ésta rexistró un descensu de 25,07 por cientu sobre'l mes d'ochobre y el descensu internañal foi del 22,27. De la memsa manera, del total de contratos rexistraos (20.545), 2.093 fueron indefiníos y 18.452 temporales.

Por comunidaes, Asturies foi la quinta onde más aumentó'l desemplegu, superada por La Rioxa, Navarra, Baleares y Cantabria.

DATOS NACIONALES

A nivel nacioanl, el númberu de paraos rexistraos nes oficines del Institutu Nacional d'Emplegu (Inem) subió en 171.242 persones en payares, el 6% sobre ochobre, colo que la cifra total de desemplegaos roza yá la barrera de los tres millones, al asitiase en 2.989.269 persones, datu que nun s'algamaba dende febreru de 1996, cuando'l total de paraos superó los 2,99 millones, informó güei'l Ministeriu de Trabayu y Inmigración.

Per primer vez en 12 años, el pasáu mes de payares sobrepasóse la barrera de los 2,9 millones de paraos. Esta subida ye la octava siguida y ye casi cuatro veces superior a la rexistrada en payares del añu pasáu, cuando'l desemplegu s'incrementó en 45.896 persones. En tola serie histórica comparable qu'entama en 1996 el paru subió siempre en payares, anque nunca tanto como esti añu.

En términos interañales, el paru siguió subiendo en payares. Así, nel últimu añu'l paru acumula un repunte de 894.796 persones (+42,7%), de los que 613.733 son varones, con un incrementu interañal del 73,5% y 281.063 muyres, con una subida sobre payares del añu pasáu del 22,3%.

N'ochobre, el paru s'anotó una subida de 192.658 persones, la cifra dalgo superior al incrementu rexistráu'l mes pasáu. Nesti sen, la secretaria xenral d'Emplegu, Maravillas Rojo, afirmó nun comunicáu qu'anque'l periodu actual ye de "gran dificultá", el datu de payares supón un "amenorgamientu" nel crecimientu del desemplegu sobre'l mes anterior. De la mesma manera, Rojo mostróse convencida de que gracies a les midíes entamaes pol Gobiernu nel área d'emplegu, la situación del mercáu llaboral va meyorar.

Según la responsable d'Emplegu, un total de 336.083 persones abandonaron los rexistros del paru en payares, lo qu'indica la rotación existente nel mercáu llaboral. "Hai un ampliu tránsitu de persones que pasen del desemplegu al emplegu y del emplegu al desemplegu y ello mos conduz a un datu relevante: más de la metá de los desemplegaos lleven nel rexistru menos de cuatro meses", sorrayó Rojo.