UVIÉU, 3 de Febreru (EUROPA PRESS)
El númberu de paraos n'Asturies baxó en 1.212 persones en febreru, lo que supón un descensu del 1,22 por cientu con respectu al mes anterior, asitiándose'l númberu de paraos na rexón en 98.302 persones, d'acuerdu a los datos publicaos esta mañana pol Ministeriu d'Empléu.
En términos añales, el descensu del númberu de persones en situación de desempléu supunxo una reducción de 5.497 persones, lo qu'implica qu'hai un 5,30 por cientu menos de paraos qu'en febreru del 2014.
Por xéneros, el paru ye mayor ente les muyeres --51.522-- qu'ente los homes --46.780--. Atendiendo a la edá, el paru xuvenil --ente los menores de 25 años-- supunxo'l 7,51 por cientu del total de paraos na comunidá autónoma, subiendo hasta los 7.383 paraos. D'ellos, 3.924 son homes y 3.459 muyeres.
Del conxuntu de los 98.302 paraos, 6.709 son estranxeros, concentrándose la mayoría --3.742-- nel sector servicios. El sector nel que más baxó'l númberu de persones desemplegaes foi'l sector servicios, onde baxó en 869 persones, hasta los 56.359 paraos, siguíu de la construcción --219 paraos menos, llegando a los 12.263 paraos--, la industria --210 menos, hasta los 9.224-- y l'agricultura, onde baxó en 23 persones, quedando'l númberu de paraos nel sector en 1.812.
A nivel nacional, el númberu de paraos rexistraos nes oficines de los servicios públicos d'empléu (antiguu Inem) quedó al rematar febreru en 4.512.153 persones, en baxando en 13.538 desemplegaos respectu al mes anterior, el so mayor descensu nun mes de febreru dende'l 2001.
BAXA LA CONTRATACIÓN
En total soscribiéronse n'Asturies 19.884 nuevos contratos, siendo 1.736 los indefiníos y 18.148 los temporales. Estes cifres suponen un descensu na contratación del 10,5 por cientu, con 2.334 contratos menos, en comparanza col mes de xineru. Pela contra, atendiendo a la variación añal, el númberu de contratos roblaos aumentó un 21,10 por cientu, elevándose la cantidá hasta los 3.464.
La contratación indefinida cayó n'Asturies en 258 persones en febreru --un 12,94 por cientu--. Sicasí, en términos añales la contratación indefinida aumentó un 17,93 por cientu, con 264 nuevos contratos indefiníos más qu'en febreru del 2014.
Los contratos temporales, pela so parte, sufrieron un descensu del 10,27 por cientu en comparanza col mes de xineru, cayendo en 2.076, anque al respecto de los datos de febreru del pasáu añu, esti tipu de contratación aumentó en 3.200 persones.
