La desulfuradora de la térmica de Lada va reducir un 80% les emisiones de particulares y hasta un 98% les d'azufre

LLANGRÉU, 20 de Payares (EUROPA PRESS)

El director de la central térmica qu'Iberdrola tien en Llangréu, Ángel Itxaso, esplicó güei que la desulfuradora que se ta incorporando nel camín de fumos de la planta va reducir nun 80% les emisiones de partícules y ente un 95% y un 98% les d'azufre (SO2), anque'l mesmu comentó que les emisiones hasta agora yeren yá "bien reducíes".

Itxaso realizó estes manifestaciones nel marcu de la visita que representantes del Conceyu de Llangréu realizaron a la central térmica, asitiada ente les poblaciones llangreanes de Lada y La Felguera.

El director d'Iberdrola en Llangréu comentó que la visita a representantes de la Corporación concedióse tres un pidimientu de l'Alcaldía que, según señaló la propia alcaldesa, Esther Díaz, tuvo motivada pol interés en conocer y analizar "el nivel d'inversiones" que se ta realizando na central térmica y "l'efeutu d'eses inversiones nel mediu ambiente, asina como les midíes que van tomase pa evitar ruios y impautu estéticu y visual".

Ángel Itxaso esplicó que la incorporación de la desulfuradora que se ta faciendo aprovechando la parada de revisión xeneral que se realizó na central térmica, qu'entamó'l pasáu 20 d'ochobre y que va prollongase hasta'l mes de maru del 2009.

"La parada faise, amás de pa la sustitución de tolos equipos, pa incorporar la desulfuradora nel camín de los fumos", declaró'l director d'Iberdrola en Llangréu, qu'estimó que cuando acabe en marzu la parada de revisión xeneral van entamase les pruebes de funcionamientu de la central, "cola desulfuradora yá integrada".

Dempués, van realizse trabayos pa rebaxar l'impautu visual de la caldera. Nesti sen, Itxaso comentó que "va 'panelase' la caldera na midida de lo posible", puesto qu'añadió que diba 'panelar' de manera integral nun se va poder facer "porque la estructura nun lo diba soportar pol efeutu vela", que según esplicó, diba tener que ver cola presión que diba exercer el vientu sobre la estructura.

Sicasí, el representante d'Iberdrola en Llangréu indicó que se prevé dar "cobertoria integral a dos cares de la caldera", que según añadió, diben ser "les que miren hacia'l pueblu".

"Tenemos un par d'idees y hai que facer un par de pruebes pa ver si aguanta l'efeutu vela", indicó Ángel Itxaso, que manifestó sobre'l coste d'esta actuación que "la inversión ta dientro del global de la instalación, que son cien millones d'euros". En concreto, dixo que se podía dedicar "un 1% del global, que diba ser un millón d'euros". L'actuación d'amenorgar l'impautu visual podía prollongse ente seis y ocho meses, puesto que'l responsable de la planta d'Iberdrola en Llangréu declaró que "el proyeutu d'inxeniería lleva tiempu".

Sobre la xente que diba requerise pa poner a puntu la central térmica de Lada, Itxaso indicó que trabayen 130 persones de plantiya, 80 de subcontrates, 260 instalando la desulfuradora y otros 260 se dediquen a los llabores rellacionaos cola parada y revisión de la central. En total, 730 persones van trabayar hasta marzu na central térmica de Lada.