Detenida una moza acusada de causar lesiones al fíu, d'añu y mediu d'edá, al zarandialu

UVIÉU, 14 de Xunu (EUROPA PRESS)

Efectivos de la Policía Nacional detuvieron el pasáu fin de selmana a una moza uvieína acusada de causar delles lesiones en piernes, costazos y cabeza, al so fíu, d'aprosimao un añu y mediu d'edá, posiblemente al zarandialu.

Asina lo informaron a Europa Press fontes cercanes al casu. La madre quedó en llibertá en declarando ante'l xulgáu de guardia, y a la espera de que se decida sobre la custodia del menor.

Al paecer, foi la Unidá de Pediatría del Hospital Central Universitariu del HUCA, onde ingresara'l neñu, la que dio parte de la situación al xulgáu, y ésti encargó una investigación a la policía.

El neñu ingresara nel hospital, deriváu del centru de salú al que lu llevara la madre. Encamentárenla a acudir al médicu los responsables de la guardería a la que va davezu, al observar les dificultaes que'l menor presentaba pa caminar, asina como los daños per otres partes del cuerpu.

Al recibir la encomienda de la investigación, la policía interrogó a les persones coles que'l neñu tuviera tratu: los responsables de la guardería, la so madre y el so güelu, y padre d'ella. Según les fontes del casu, el padre biolóxicu nun caltién nengún contactu col menor.

Tres les correspondientes presquises, la Policía abarruntó que les lesiones produxéronse tres una somenada de la madre, y procedió a la so detención, pese a que, de siguío quedó en llibertá dempués de declarar ante'l xuez.