PARÍS, 19 de Xunetu (EUROPA PRESS)
El xefe del Estáu Mayor de les Fuerces Armaes franceses, Pierre de Villiers, anunció esti miércoles la so dimisión, dempués d'espresar el so desacuerdu colos recortes previstos pol presidente, Emmanuel Macron, nel estamentu militar.
Nun comunicáu enviáu a l'axencia AFP, De Villiers esplicó que considera que "nun ta en midida de garantizar el caltenimientu del modelu d'Exércitu nel que cree pa garantizar la protección de Francia y los franceses, güei y mañana, y apoyar les ambiciones del nuesu país".
Por ello, añadió, asumió la so responsabilidá y decidió presentar a Macron la so renuncia, quien la aceptó, acabante de ratificalu nel cargu magar les sos crítiques al presupuestu previstu pol mandatariu pal Exércitu.
De Villiers espresara'l so malestar col enfotu de Macron d'amenorgar en 850 millones d'euros el presupuestu del Exércitu pa esti añu mientres una xunta a puerta zarrada de la comisión de Defensa de l'Asamblea, considerando que yera "insostenible".
Macron llamáralu al orde, anque sin citalu espresamente, en plenos actos del 14 de xunetu, Día Nacional en Francia, considerando que yera "indigno" el que s'abriera un alderique públicu sobre'l presupuestu militar.
Coles mesmes, el voceru del Gobiernu, Christophe Castaner, señalara esti llunes que Macron y De Villiers diben alcontrar "una solución xuntos" al discutiniu. El xeneral De Villiers "ye un militar y conoz bien el sen de l'autoridá", defendiera'l voceru, xustificando'l "llamáu al orde" del presidente.
Según resaltó en declaraciones a Le Monde, l'historiador y espertu en defensa Philippe Vial, "a nengún xefe del Estáu Mayor de les Fuerces Armaes emburrióselu" dende que'l cargu quedó baxo la responsabilidá del Ministeriu de Defensa en 1962. Hasta agora, precisó, namás dimitieren los xefes del Estáu Mayor de dalgún de los cuerpos de les Fuerces Armaes.
