MADRID, 30 de Marzu (EUROPA PRESS)
Los diputaos del PDeCAT abandonaron esti xueves el Plenu del Congresu en señal de protesta ante la imposibilidá de denunciar mientres la sesión "la espulsión" de la Cámara del que fuera'l so voceru, Francesc Homs, n'aplicación de la sentencia del Tribunal Supremu que la condena a 13 meses d'inhabilitación pola consulta soberanista del 9P.
Con ellos tamién lo ficieron los d'Uníos Podemos y ERC, pero ente que éstos volvieron a los sos escaños, los del PDeCAT nun lo van faer hasta'l próximu miércoles.
Namás empezar la sesión plenaria d'esti xueves, el voceru axuntu del PDeCAT, Carles Campuzano, solicitó a la presidenta del Congresu, Ana Pastor, tomar la palabra pa defender "la dignidá" del so grupu, dixo, dempués de que la Cámara Baxa, n'execución de la sentencia del Altu Tribunal, procediera a inhabilitar a Homs, que perdió esti miércoles la so condición de diputáu.
"NUN HAI LLUGAR"
Sicasí, Pastor frenó la so pretensión señalando que nun procedía concede-y la palabra pola cuestión a la que facía alusión porque, según argumentó, yá se debatió nel alderique del suplicatoriu del propiu Homs: "Nun hai llugar", atayó.
Ante esta respuesta, un Campuzano visiblemente cafiante, avanzaba, anque los micrófonos nun lo pudieron recoyer, que los parlamentarios del PDeCAT abandonaben l'hemiciclu. Y asina lo ficieron, y con ellos solidarizáronse los diputaos d'Uníos Podemos y d'ERC, que tamién salieron unos minutos del Salón de Plenos.
Yá nos pasiellos del Congresu, Campuzano quiso dar les gracies a dambos grupos por acompañalos nesti xestu que, al so xuiciu, espresa una "idea fundamental": "Que la cuestión catalana güei ye la cuestión de la democracia n'España". Y, añadió, la democracia española quedaría "gravemente tocada" si nun da una "bona salida" a la demanda de Cataluña pa poder decidir el so futuru.
De la mesma, esplicó que los diputaos del PDeCAT van ausentase del Plenu d'esti xueves y que nun van volver yá hasta'l próximu miércoles en señal de protesta, perdiéndose asina les votaciones d'esti mesmu xueves y les de la sesión del próximu martes.
