UVIÉU, 20 de Xunetu (EUROPA PRESS)
La Policía Nacional de Xixón detuvo a dos mozos más pola agresión asocedida na cai Marques de San Esteban na madrugada del vienres 14 de xunetu pola qu'un mozu de 25 años permanez ingresáu nel Hospital Universitariu Central d'Asturies.
Según informa la Policía en nota de prensa, les detenciones produxéronse esti miércoles, resultando dos mozos de 20 y 22 años presuntos autores de l'agresión.
Los fechos asocedieron el pasáu vienres 14 de xunetu sobre les 4.30 hores de la madrugada, cuando un mozu de 25 años resultó agredíu brutalmente na cai Marques de San Esteban por dos mozos de 19 y 20 años a lso que la Policía detuvo por talos fechos y punxo a disposición de l'Autoridá Xudicial, decretando dicha Autoridá l'ingresu en prisión de dambos.
Funcionarios ascritos al Grupu II de Policía Xudicial de la Comisaría de Policía Nacional encargaos de la investigación, tres l'ingresu en prisión de los presuntos autores de los fechos siguieron cola mesma ya identificaron a dos mozos presuntos autores directos de les lesiones graves causaes a la víctima.
Unu de los presuntos autores, de 20 años, resultó deteníu na so casa na mañana del día d'ayeri sobre les 09.45 hores. Al otru presuntu autor, de 22 años, detuviéronlu na redoma de la Comisaría na tarde d'ayeri sobre les 19.15 hores.
Dambos quedaron a disposición de l'Autoridá Xudicial na mañana d'esti xueves, tando nestos momentos a la espera de que los escuchen en declaración.
