Ecoloxistes alvierten del altu grau de contaminación en Xixón a pesar de la reducción de producción n'Aboño

XIXÓN, 9 de Marzu (EUROPA PRESS)

La Coordinadora Ecoloxista d'Asturies alvirtió güei, nun comunicáu, del altu grau de contaminación de la ciudá de Xixón, a pesar de que l'añu 2009 foi un añu onde baxó de forma significativa la producción industrial asturiana con instalaciones paraes y baxo mínimos y de la significativa reducción de la producción eléctrica del complexu d'Aboño.

En Partícules en Suspensión (PM10), siendo'l valor mediu añal d'esti contaminante de 43 ug/m3, penriba de los 40ug/m3 de valor máximu añal, superaron los niveles de protección a la salú en 104 díes del añu, doblando los datos d'otros años esti nivel diariu que ta en 50 ug/m3, nun pudiendo superase mas de 35 veces por añu. Los peores datos tienlos les estación de l'Avenida Arxentina. "Estes partícules añádense a l'apaición y agravamientu de múltiples patoloxíes especialmente respiratories", comenta'l colectivu.

N'Óxidos de Nitrógeno (N0x y NON2). Nel casu del NOx supérose tol añu la llende añal de protección a la vexetación que ta en 30 ug/m3l, al tener una media de 67 ug/m3. Les peores datos tiénenlos les estaciones d'Avenida de la Constitución y Hermanos Felgueroso.

Los Óxidos de nitróxenu provoquen irritaciones del sistema respiratoriu, reducción de la función pulmonar, agravamientu d'alerxes respiratories y asma, favorez les bronquitis y bronconeumoníes y empeora l'EPOC.

Nuna comarca como la xixonesa onde yá se tien una elevada tasa d'enfermos respiratorios, cardiovasculares y tumorales, "nun tien sen algún apoyar instalaciones que nun xeneren emplegu, que nun creen valor añadíu y sólo mos dexen la contaminación, como son los proyectos d'instalaciones contaminantes como la incineradora proyectada pa Coxersa de 450.000 tonelaes de residuos, la térmica de gas d'El Musel de 800 MW o la Regasificadora d'El Musel, según manifestaron los ecoloxistes.