MADRID, 23 Oct. (EUROPA PRESS) -
Too cambió hai trés años, cuando nun pueblu de l'Asturies rural producióse un desastre nuclear ensin precedentes nel Estáu. Muerte, destrucción y un regueru de vides mancaes pa siempre. Ente elles, la d'Héctor, inspector de policía y superviviente de la traxedia qu'agora vuelve a 'La Zona' pa intentar resolver un asesinatu brutal y, más tovía, pa facer frente al so propiu pasáu.
"Podría ser una alegoría de la crisis; pringan los más desfavorecios y los ricos mesmo faen pasta", confiesa Eduard Fernández nuna entrevista a Europa Press. El ganador de dos premios Goya da vida al protagonista d'esta ficción dirixida polos hermanos Jorge y Alberto Sánchez-Cabezudo (Crematorio) qu'aterriza en Movistar+ esti vienres 27 d'ochobre.
"De base ye un thriller sobre la investigación d'un asesinatu -prosigue l'actor barcelonés-, pero depués hai qu'analizar les consecuencies que l'escape nuclear tien a nivel social". Y ye que cuando Héctor vuelve a casa, aquello ye cualquier cosa menos el so llar. Agora les mafies llúcrense estrayendo materiales contaminaos, que se coticen a un valir grande nel mercáu negru. Mentes, caún de los sos familiares y amigos carga con una llosa difícil de soportar. "Esta serie tien una carga personal bien potente", afirma Fernández.
Nesta cruda y intensa aventura Héctor nun ta solu. Acompáñalu Martín (Álvaro Cervantes), el policía nuevu que, n'ausencia del so mentor, tuvo que soportar el pesu de toles investigaciones que surdieron alredor de la catástrofe. Alexandra Jiménez ye Julia, una doctora militar encargada d'atender a los afectaos y l'actual novia d'Héctor, mentes que Emma Suárez da vida a Marta, la exmuyer que'l protagonista nunca consiguió escaecer.
Pela so parte, Alba Galocha tien el papel de Zoe, una moza metida a contrabandista por obligación na qu'Héctor va ver un espeyu del so fíu menor, al que perdió nel accidente. "La mio rellación con Zoe tien daqué de padre anque ella nun lo crea y piense que la toi puteando como policía", esplica Fernández. Un elencu d'esceición que completen nomes tan conocíos como Juan Echanove, Carlos Bardem, Luis Zahera o Sergio Peris-Mencheta, ente otros.
"HÉCTOR FOI MANCÁU PA SIEMPRE"
"Pa Héctor supón l'alicar, la segunda oportunidá d'una persona que foi mancáu pa siempre", comenta Fernández sobre'l regresu del so personaxe, el que tres la muerte del so fíu y sobrevivir a un accidente nuclear "lleva'l llombu una culpa inesplicable por tar vivu". Sicasí, l'actor alvierte de la so fortaleza y decisión. "Ye un policía bonu y p'atopar la verdá o al culpable va ser capaz d'averase a la llinia de lo llegal y lo illegal".
En cuanto al rodaxe, de 14 selmanes de duración y nuna variedá grande d'escenarios naturales, Eduard confiesa que foi más esixente de lo habitual... anque'l resultáu valió la pena. "Foi bien trabayosu pero entendímonos bien; rodamos como si fuera cine". Asina, l'actor catalán nun dexa pasar la oportunidá de destacar el talentu de los ceadores: "Jorge y Alberto tienen una solidez nos guiones bestial; poques veces lleí testos tan sólidos".
Pa terminar, el protagonista de La Zona va más allá y asegura que "yá dixera que non a dalguna tele...". ¿Esperaba un proyectu que cumpliera ciertes condiciones? "Claro, yo dicía: 'home facer tele... si fuera tan bona como Crematorio, nun tendría problema'". P'acabar, los hermanos Sánchez-Cabezudo llamaron a la so puerta y lo demás ye historia. Una producción que l'actor califica como "televisión de calidá y ensin nengún complexu énte'l cine".
