ISTAMBUL, 2 d'Ochobre (Reuters/EP)
Francia, Alemaña, Reinu Uníu, Turquía, Arabia Saudina, Qatar y Estaos Uníos reclamaron esti vienres a Rusia que detenga "de momentu" los ataques aéreos contra les "fuerces rebeldes" en Siria, de la que-y alvirtieron de qu'estos bombardeos namás van provocar "más estremismu y radicalización".
"Espresamos la nuesa fonda preocupación pola escalada militar rusa en Siria y especialmente polos ataques d'ayeri de la Fuerza Aérea rusa n'Hama, Homs y Idlib que provocaron muertes civiles y nun diben dirixíos contra DAESH", afirmaron los siete países nuna declaración conxunta.
"Estes acciones militares --alvirtieron-- constitúin una mayor escalada y namás van provocar más estremismu y radicalización". Los países de la coalición militar contra Estáu Islámicu esixeron a Rusia "que cese de momentu los ataques contra la oposición siria y los civiles" y "centre los sos esfuerzos" en combatir a Estáu Islámicu.
Rusia entamó esti miércoles la so propia campaña d'ataques aéreos en Siria pa frenar la meyora d'Estáu Islámicu y apoyar al réxime que preside Bashar al Assad. Fontes estaounidenses denunciaron que los primeros bombardeos nun fueron dirixíos contra esti grupu terrorista sinón contra los rebeldes que lluchen contra les fuerces d'Al Assad.
Lo mesmo la Defensa Civil Siria, un grupu de voluntarios qu'atiende a les víctimes del conflictu, como'l líder de la Coalición Nacional Siria, ente otres fontes, aseguraron que polo menos una trentena de civiles, incluyíos neños, morrieron nos primeros bombardeos de la Fuerza Aéreo rusa.
