UVIÉU, 08 d'Ochobre (EUROPA PRESS)
Los escritores Elías Veiga (na modalidá de poesía), Berta Piñán (novela infantil y xuvenil) y Xuan Santorí (cuentu) son los ganadores de los premios de La Crítica d'Asturies, que concede l'Asociación d'Escritores d'Asturies, a obres n'asturianu. Na so versión castellana, los galardonaos fueron Ricardo Menéndez Salmón (novela), Alejandro Céspedes (poesía), Miguel Rojo (lliteratura infantil y xuvenil) y José Luis Espina (cuentu), amás del premiu de Les Lletres, pal catedráticu en Lliteratura Española de la Universidá d'Uviéu, José María Martínez Cachero, y el premiu al columnismu lliterariu, que foi pa Pedro de Silva.
La Asociación d'Escritores informó de los ganadores al traviés d'una nota prensa, na qu'enumberó los premios y les sos obres poles que son merecedores d'esta reconocencia.
Elías Veiga algamó'l premiu de poesía pola obra 'Robinson Astur', destacando que ye un poemraiu esquisitu y conmovedor, de gran pesu lliterariu y sobresaliente capacidá d'empatía del autor. Berta Piñán foi ganadora pola obra 'Les coses que-y presten a Fran', destacando que ye un llibru llenu d'interés y actualdiá, y recalcando la especial orixinalidá del tratamientu rítmicu de la obra.
Na modalidá de cuentu en llingua asturiana, otórgóse a Xuan Santoría Vázquez, pola obra 'La fábrica de lluz', destacando la variedá de rexistros y de temes, asina como l'usu del idioma.
Per otra parte, l'escritor Ricardo Menéndez Salmón, algamó por 'Derrumbe', el premiu de novela en llingua española. El xuráu destacó nesta obra la especial concepción del tiempu, qu'anula'l so carácter llinial, apoyada na precisión del llinguaxe.
Na modalidá de poesía en llingua española, el xuráu premió a Alejandro Céspedes, por 'Los círculos concéntricos', destacando que l'autor muestra nesti poemariu una voz mui personal pa un discursu poéticu onde destaquen l'arquitectura del testu, el sen del ritmu y l'acertada simbiosis ente lo narrativo y lo llírico. De la mesma manera, valora l'aciertu con que se cultiva'l poema en prosa nesti llibru d'amor y dolor fonderos, llenu de veracidá y emoción, qu'examina valientemente ciertos tabús actuales y que desasosiega pola so crudeza.
Miguel Rojo recibió'l de lliteratura infantil y xuvenil en llingua española pola obra titulada 'El viaje de Tino y Ton'. El xuráu destacó'l llinguaxe frescu y desenfadáu, tratando de manera actual y posibilidando diferentes llectures d'un tema clásicu pa estes edaes, como ye la llucha por algamar un suañu y faciendo partícipe al illustrador, de manera eficaz, na filaza de la historia.
Na modalidá de cuentu en llingua española, el galardón recayó en José Luis Espina, pola obra 'No gana uno para sustos'. El xuráu destacó la naturalidá del so llinguaxe, el poder de captación de la so narrativa y la facilidá de llectura, que mos tresllada a ambientes costumistes que mos averen a un pasáu común y mui próximu, faciéndomos partícipes del mesmu.
Per otra parte, en columnismu lliterariu en llingua española, el premiu recayó en Pedro de Silva. El xuráu destacó la dilatada trayectoria y implicación sociocultural del autor, asina como la so capacidá de síntesis a la hora de tratar dellos temes d'una manera fondera y personal.
Los Premios de la Crítica d'Asturies nacieron nel añu 1999 por iniciativa d'Eva Carballo, Javier Lasheras, Juan Carlos García Villa, Jaime herrero y Helios Pandiella, col ánimu de reconocer y potenciar la lliteratura realizada n'Asturies. En cada edición prémiense los meyores llibros d'autores nacíos o residentes n'Asturies, con obres publicaes l'añu anterior a la convocatoria.
PREMIU DE LES LLETRES
El IV Premiu de Les Lletres foi pa José María Martínez Cachero (Uviéu, 1924), profesor eméritu de la Universidá d'Uviéu, onde foi catedráticu de Lliteratura Española Moderna y Contemporánea. Cofundador de la revista Archivum. Profesor visitante nes universidaes americanes Vanderbilt (Tennessee) y Alburquerque (New Mexicano). Publicó abondos estudios y ediciones crítiques y anotaes obres clásiques de la lliteratura española de los sieglos XIX y XX. Según el xuráu, la decisión debióse al so "especial dedicación a la obra de Leopoldo Alas Clarín y munchos otros escritores d'Asturies colócanse nun llugar fundamental pa comprender la lliteratura contemporánea d'Asturies, y el so trabayu valió p'asitiar nun contestu universal la lliteratura d'autores asturianos".
El Premiu de les Lletres convócase la primer vez na edición del 2005, como reconocencia al autor d'una obra que suponga una aportación especial a la lliteratura. Hasta la edición 2008 galardonóse a Gonzalo Suárez, Ángel González, Marta Portal y Luis Fernández Roces.