UVIÉU, 24 d'Abril (EUROPA PRESS)
El presidente de la Federación Asturiana d'Empresarios (FADE), Pedro Luis Fernández, aprovechó una xunta que caltuvo esti xueves col presidente d'Asturies, el socialista Javier Fernández, pa tresllada-y la necesidá de más inversiones y menos impuestos.
El líder de la patronal asturiana reunióse mientres daqué más d'una hora col dirixente asturianu na sede de Presidencia, no que constituyó'l primeru de les xuntes institucionales ente ambos. Pedro Luis Fernández salió escoyíu presidente de FADE a úlltimos de xineru.
A preguntes de los periodistes tres l'alcuentru, el tamién presidente de GAM, dixo que la cita desarrollóse nun ambiente cordial y "con sintonía", nel que los dos interlocutores compartieron bona parte de los problemes, asina como "la dificultá p'alcontrar soluciones".
No que se refiere a les inversiones, Pedro Luis Fernández esplicó que nun se ta cumpliendo "lo pactao" nel Acuerdu pol Empléu y el Progresu d'Asturies (AEPA) 2013-2015, daqué que "afecta muncho a la economía y a les empreses". En tou casu, l'empresariu señala que pue entender que los ingresos nun son abondo pa llevar a cabu eses inversiones. "Pero hai que buscar fórmules", insistió.
Ello ye que pal dirixente de la patronal asturiana'l papel de los gobernantes ye precisamente buscar esi tipu de soluciones. "La clase política ha cumplir col mandatu que-y dieron los ciudadanos", manifestó.
Pedro Luis Fernández tamién faló d'impuestos con Javier Fernández, sobremanera teniendo en cuenta l'alta presión fiscal qu'existe na comunidá al respecto d'otres comunidaes autónomes. "Nun ye bien intelixente tener disparidades fiscales con otres rexones, porque eso lo que fai ye fomentar tresllaos", comentó. Nesti sen, Pedro Luis Fernández vio "sensible" al presidente asturianu. "Otra cosa ye qu'alcuentre la solución afayadiza", manifestó.
Na xunta tamién falaron sobre la tarifa eléctrica, un aspectu que resulta "mui preocupante" pa los empresarios. "Toos tamos d'acuerdu en que'l mercáu eléctricu n'España nun yera bien racional, pero otra cosa ye que se tenga qu'axustase a hachazos, afectando de forma clara a la industria", indicó.
DE GUINDOS
Preguntáu sobre les últimes previsiones optimistes ministru d'Economía y de Competitividá, Luis de Guindos, sobre'l crecimientu de la economía n'España, Pedro Luis Fernández indicó que lo más importante ye xenerar "confianza", una vez qu'España yá fizo "munchos deberes" a lo llargo de los últimos tiempos. "Lo importante ye que teamos falando yá de crecimientu", señaló.
Nel casu d'Asturies, el presidente de FADE tamién cree que'l futuru pue ser meyor, eso sí, siempre que nun s'olvide nel futuru de les esportaciones, anque se recupere demanda interna. "Creo que'l tonu ye meyor", afirmó.
