LIMA, 6 d'Ochobre (EUROPA PRESS)
El Fondu Monetariu Internacional (FMI) caltuvo sin cambeos les sos previsiones de crecimientu pa España, que va rexistrar una espansión del 3,1% esti añu y del 2,5% nel 2016, magar l'empeoramientu xeneralizáu de les proyecciones de la institución internacional, qu'alvirtió que los riesgos a la baxa pa la economía mundial "güei paecen más pronunciaos que va unos meses".
El FMI confirma asina nel so informe 'Perspectives económiques mundiales' los sos pronósticos pa la economía española, que va ser la que rexistre un mayor ritmu de crecimientu esti añu ente les principales economíes mundiales.
La fortaleza de la recuperación de l'actividá n'España refléxase nes previsiones de desempléu manexaes pol FMI, qu'espera que la tasa de paru zarre'l 2015 nel 21,8% y baxe un añu dempués al 19,9%, meyorando asina lo previsto'l pasáu mes d'agostu, cuando prevía que la tasa de paru español nel 2015 fuera del 22% y del 21,1% nel 2016.
No que va d'añu, la institución dirixida por Christine Lagarde llevó a cabu una fonda revisión al alza de les sos espectatives de crecimientu pa España, a la que'l pasáu mes de xineru axudicaba un crecimientu del PIB del 2% nel 2015 y del 1,8% nel 2016.
D'esta manera, España llogra, xunto de Francia, Italia y Reinu Uníu, desmarcase del empeoramientu xeneralizáu de les proyecciones del FMI, que recortó en dos décimes les sos previsiones de crecimientu pa la economía global nel 2015 y 2016, hasta'l 3,1% y el 3,6%, respectivamente.
"Los nuevos pronósticos corrixen a la baxa les tases de crecimientu al cortu plazu de manera marxinal, pero pa casi tolos países", apunta'l Fondu, que, amás alvierte que "los riesgos a la baxa pa la economía mundial agora paecen más pronunciaos que va namás unos meses".
