España nun supera la recesión nel cuartu trimestre (-0,1%) y cai un 3,6% nel 2009, según el Bancu d'España

EP

MADRID, 5 de Febreru (EUROPA PRESS)

España nun salió de la recesión nel cuartu trimestre al rexistrar una cayida intertrimestral del PIB del 0,1% y una cayida interañal del 3,1%, polo que la cayida global del añu foi del 3,6%, según s'entiende del últimu Boletín Económicu del Bancu d'España correspondiente al mes de xineru.

Estes cifres suponen cierta moderación respeuto a les del trimestre anterior, cuando'l PIB cayó un 0,3% en tasa intertrimestral y un 4% en tasa interañal y constaten les previsiones del Executivu, que siempre caltuvo que la economía española nun saldría de la recesión nel 2009 y apuntaba una cayida global del 3,6%, nel conxuntu del añu.

El descensu del 3,6% que s'anotó la economía española ye, según el Bancu d'España, "la mayor cayida de l'actividá" de les últimes décades y ta en consonancia cola severidá de les tendencies contratives a les que s'enfrentó la economía mundial nos últimos años.

Sicasí, los datos del cuartu trimestre espeyen que'l retrocesu de la demanda nacional fízose "menos pronunciáu" (hasta'l -4,8%), anque esto débese, en parte, al efectu d'algunes midíes públiques con impactu transitoriu, como'l Plan 2000E y el Fondu d'Inversión Llocal. La contribución positiva del sector esterior continuó siendo elevada (dos puntos) anque inferior a la del trimestre precedente.

En concreto, el gastu en consumu final de les families caltuvo la "tónica de debilidá" de los trimestres previos, anque en términos intertrimestrales podría mostrar una tasa "llixeramente positiva", tres siete trimestres de retrocesu, gracies, en parte, al "intensu" crecimientu de les matriculaciones pol Plan 2000E que, podía suponer antemanar el gastu y acabar, poro, recuperando la demanda d'estos bienes nel futuru.

El gastu en consumu de les families viose afectáu nel cuartu trimestre pola rocea asociada al "marcáu deterioru" del mercáu de trabayu y pol efectu negativu de la destrucción d'emplegu sobre les rentes salariales, anque tamién contribuyeron les restricciones de creitu y l'amenorgamientu de la riqueza asociada a la tendencia descendente del preciu de la vivieda.