España ye'l país de la UE onde los neños entamen a deprender idiomes a una edá más temprana

UVIÉU, 21 de Payares (EUROPA PRESS)

España ye'l país de la Unión Europea onde los neños entamen a deprender un idioma estranxeru a una edá más temprana, de magar los tres años, según se recueye nun estudiu sobre l'enseñu d'idiomes nos colexos comunitaries presentáu güei pola Comisión Europea.

L'estudiu, ellaboráu pola rede d'información sobre la educación n'Europa 'Eurydice', señala que "en dalgunes comunidaes autónomes n'España, los neños entamaron ya deprender una llingua estranxera de magar de los tres años, y esta práutica ta estendiéndose al conxuntu del país demientres l'añua escolar 2008/2009.

Tamién na comunidá xermanófona de Bélxica la enseñanza d'una llingua estranxera entama a los tres años. En contraste, na mayoría de los Estaos miembros, los neños entamen a deprender un idioma estranxeru muncho más tarde, ente los ocho y los diez años.

En cualquier casu, el tiempu dedicáu a la enseñanza d'idiomes estranxeros nes escueles primaries ye llendáu y asítiase xeneralmente perbaxo del 10% del horariu llectivu total, menos en Bélxica (14%), Malta (15%) y Luxemburgo (39%). N'España, el tiempu mediu dedicáu a deprender una llingua estranxera en primaria ye sólo'l 6,5% del total.

No que cinca a la enseñanza secundaria obligatoria, la cuota de tiempu dedicada a idiomes estranxeros n'España sube hasta'l 10,7%. Pero queda mui lloñe d'otros países como Bulgaria, Dinamarca, Estonia, Lituania, Malta o Luxemburgo, que consagren a estes asignatures más del 20% del horariu escolar.

L'estudiu, basáu en datos del cursu escolar 2006/2007, destaca que, na enseñanza secundaria obligatoria, sobre'l 58% de los alumnos en toa Europa deprende dos o más idiomes estranxeros. La mayoría d'Estos miembros, ente ellos España, ofrez yá la posibilidá d'estudiar polo menos dos llingües demientres la enseñanza obligatoria. Les úniques esceiciones son Alemaña y Polonia.

El 90% de los alumnos europeos estudia inglés en dalgún momentu de la so enseñanza obligatoria. Cuando s'enseña una segunda llingua predominen el francés y l'alemán. No que cinca al español, la proporción d'alumnos que lu deprende nel restu de países de la UE ye inferior al 20%. Les principales esceiciones son Francia (62,4%), Suecia (40,6%) y Dinamarca (27,9%).

El comisariu responsable d'Educación, Jan Figel, señaló nun comunicáu que, anque s'avanzare, tovía "queda camín por percorrer pa ofrecer a tolos estudiantes la posibilidá de deprender dos llingües estranxeres nel colexu", tal y como acordaron los cabezaleros europeos en Barcelona nel 2002.