UVIÉU, 22 Jul. (EUROPA PRESS) -
La esplosión producida nel Prao'l Molín, en Cangas, mentes se celebraba la descarga a mano de les peñes acabó con un pirotécnicu mancáu por quemadures y una ventena de mancaos pola rotura de cristales. Toos de calter leve.
Asina lo confirmó l'alcalde de Cangas, José Víctor Rodríguez, nun mensaxe na so cuenta de Facebook recoyíu por Europa Press onde esplica que "por fortuna nun tenemos más que llamentar mancaos leves y daños materiales, sobremanera de cristales".
Asina, l'alcalde cangués esplicó que los pirotécnicos tamién tán bien, pero qu'ún d'ellos ta mancáu con quemadures leves. Amás, punxo en valir el trabayu de tolos miembros del Plan de Seguridá pol so llabor y respuesta "inmediata".
Les fiestes patronales de La Madalena quedaron suspendíes y énte la rotura d'escaparates en locales comerciales, José Víctor Rodríguez solicitó al traviés de 112 refuerciu de Guardia Civil pa patrullar y curiar los mesmos.
"En poco más d'una hora, Guardia Civil dobló los sos efectivos. Lo mesmo pasó con Policía Local y personal médico del Hospital, que mesmo abrió'l Centru de Salú p'atender a mancaos", afirmó l'alcalde.
"La seguridá funciona, de lo contrario taríamos falando d'una traxedia. Agora a valorar qué hai que facer pa que dalgo asina nun vuelva pasar, una vez que mañana --por güei domingu-- tengamos tolos datos", sentenció Rodríguez nun mensaxe en Facebook escritu sobre les 5.00 hores d'esti domingu.
L'ESPAÑÍU
Alredor de les 0.00 hores, la descarga a mano de les peñes viose atayada cuando se produció una gran esplosión y el llanzamientu posterior de tol material pirotécnicu.
El fallu producióse depués de qu'un volador esvíarase escontra'l Prao'l Molín, onde taba tola pólvora, polo que se xeneró un gran españíu y la rotura de cristales en cases y comercios de tola villa de Cangas. Mesmo cayeron delles muries el llugar.
La Policía Local cortó cais de la localidá y tanto estos como la Guardia Civil encargáronse de la seguridá de los comercios, bancos y locales afectaos.
