"Esti gobiernu siempre tuvo voluntá d'alcuerdu", diz Martínez sobre la fuelga en xusticia

Publicado 13/09/2017 14:56:26CET

UVIÉU, 13 Sep. (EUROPA PRESS) -

El conseyeru de Presidencia del Gobiernu asturianu, el socialista Guillermo Martínez, defendió esti miércoles la forma d'actuar del so departamentu a la hora de negociar colos sindicatos de xusticia, qu'anunciaron una fuelga a partir del día 2 d'ochobre.

"Esti gobiernu siempre tuvo voluntá d'alcuerdu", afirmó'l dirixente asturianu cuando-y preguntaron pola fuelga. Martínez adelantó que va volver convocar a los sindicatos a una xunta y espera que desconvoquen la fuelga.

Pa demostrar la voluntá negociadora del Gobiernu, Guillermo Martínez punxo d'exemplu que nel empiezu de les xuntes la ufierta yera d'un complementu retributivu de 70 euros, pero que depués la llegaron a xubir a los 90 euros. "Eso significa un gastu de 1,6 millones de gastu pal conxuntu de los funcionarios", esplicó.

Esplicó que'l Gobiernu tamién propunxo recuperar un complementu que se retirara, el de 110 euros a los que trabayen en xulgaos qu'atienden a víctimes de violencia de xéneru.

"Fomos flexibilizando la postura", señaló Martínez, que considera que cola última ufierta, el nivel retributivu d'esos trabayadores quedaba igualáu col de los d'otres comunidaes autónomes. "Vamos facer tolos esfuercios posibles por evitar la fuelga y ameyorar les condiciones retributivas", concluyó, señalando la so voluntá de llegar a un alcuerdu.

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies